وزیر اعلیٰ علی امین گنڈاپور کی قیادت میں خیبرپختونخوا حکومت نے ڈیجیٹل گورننس کے شعبے میں سرکاری امور کو پیپر لیس بنانے کے لئے وزیر اعلیٰ کو بھیجی جانے والی سمریاں مکمل طور پر ای-سمری سسٹم پر منتقل کر دی ہیں۔
اتوار کے روز وزیر اعلیٰ کو پہلی باضابطہ ای-سمری آن لائن موصول ہوئی، جس پر انہوں نے فوری طور پر ڈیجیٹل دستخط ثبت کرتے ہوئے اس نظام کا باقاعدہ آغاز کیا۔ اس موقع پر وزیر اعلیٰ نے کہا کہ ای-سمری کا اجراء دفتری امور اور فائل ورک کو کاغذی جھنجھٹ سے نجات دلانے کی طرف ایک انقلابی قدم ہے۔
علی امین گنڈاپور نے بتایا کہ اگلے مرحلے میں" ڈیجیٹل نوٹ پیڈ" کا بھی اجراء کیا جا رہا ہے، جبکہ سرکاری مراسلوں، اعلامیوں اور حکم ناموں کو مکمل طور پر ڈیجیٹائز کرنے کا عمل جاری ہے۔ اسی طرح صوبائی کابینہ کے اجلاسوں کے لئے ورکنگ پیپرز سمیت دیگر متعلقہ امور بھی ای-سسٹم پر منتقل کئے جا رہے ہیں۔
وزیر اعلیٰ کے مطابق اس اقدام سے نہ صرف وقت کی بچت ہوگی بلکہ سرکاری وسائل کے ضیاع کو بھی روکا جا سکے گا۔ دفتری امور میں شفافیت یقینی بنے گی اور محکموں کی کارکردگی میں بہتری آئے گی۔ انہوں نے مزید کہا کہ سرکاری کاموں میں تاخیر کے حربوں کا خاتمہ اس اقدام سے ممکن ہوگا۔
علی امین گنڈاپور نے واضح کیا کہ موجودہ صوبائی حکومت نہ صرف سرکاری محکموں بلکہ عوامی خدمات کی فراہمی کے عمل کو بھی ڈیجیٹائز کرنے پر کام کر رہی ہے۔ ڈیجیٹل گورننس روڈ میپ کے تحت پہلے ہی متعدد عوامی سروسز آن لائن کی جا چکی ہیں۔
وزیر اعلیٰ کا کہنا ہے کہ ہم عمران خان کے وژن کے مطابق خیبرپختونخوا کو مکمل طور پر ڈیجیٹل صوبہ بنائیں گے۔
.jpeg)
