خیبرپختونخوا نے محکمہ موسمیات کی پیشگوئی کے بعد صوبے کے مختلف اضلاع میں بارشوں اور آندھی کی پیشگوئی کے پیش نظر متعلقہ اداروں کو الرٹ جاری کر دیا ہے۔
پی ڈی ایم اے کے مطابق 15 ستمبر سے 19 ستمبر کے دوران خیبرپختونخوا کے مختلف علاقوں میں وقفے وقفے سے بارش، گرج چمک اور آندھی جبکہ بعض مقامات پر موسلادھار بارشوں کا امکان ہے۔
محکمہ موسمیات کے مطابق 16 سے 19 ستمبر کے دوران دیر، چترال، سوات، کوہستان، شانگلہ، مانسہرہ، ایبٹ آباد، ہری پور، بونیر، ملاکنڈ، باجوڑ، مہمند، کوہاٹ، پشاور، چارسدہ، نوشہرہ، مردان، صوابی، خیبر، اورکزئی، کرم، ہنگو، کرک اور شمالی و جنوبی وزیرستان میں بارش اور گرج چمک کے ساتھ تیز آندھی کا امکان ہے۔
مزید برآں 18 اور 19 ستمبر کے دوران شدید بارشوں کے باعث دیر، چترال، سوات، شانگلہ، بونیر، کوہستان، مانسہرہ، ایبٹ آباد، چارسدہ، نوشہرہ، صوابی اور مردان کے مقامی نالوں اور دریاؤں میں پانی کے بہاؤ میں اضافے کا خدشہ ظاہر کیا گیا ہے۔ پی ڈی ایم اے کے مطابق ایبٹ آباد، بٹگرام، چترال، دیر، خیبر، کوہستان، کولائی پالس، کرم، ملاکنڈ، مانسہرہ، مہمند، اورکزئی، شانگلہ، سوات، تورغر اور شمالی وزیرستان کے حساس پہاڑی علاقوں میں لینڈ سلائیڈنگ کا بھی خدشہ ہے۔
مراسلے میں خبردار کیا گیا ہے کہ تیز ہواؤں اور گرج چمک کے باعث کمزور مکانات، بجلی کے کھمبے، اشتہاری بورڈز اور سولر پینلز کو نقصان پہنچ سکتا ہے۔ اس صورتحال کے پیش نظر تمام ضلعی انتظامیہ کو نکاسی آب کے نظام کی صفائی، حفاظتی اقدامات اور عوامی آگاہی یقینی بنانے کی ہدایت کی گئی ہے۔
پی ڈی ایم اے نے کاشتکاروں، مال مویشی پال حضرات اور سیاحوں کو خصوصی ہدایات جاری کی ہیں کہ وہ فصلوں اور جانوروں کو محفوظ مقامات پر منتقل کریں اور سیاح خطرناک علاقوں میں جانے سے گریز کریں۔
مزید برآں، ایمرجنسی سروسز، طبی امداد، خوراک اور دیگر ضروری اشیاء کی فراہمی یقینی بنانے کی ہدایت بھی دی گئی ہے، جبکہ عوام سے اپیل کی گئی ہے کہ وہ خراب موسم کے دوران غیر ضروری سفر سے اجتناب کریں۔
پی ڈی ایم اے نے واضح کیا ہے کہ ایمرجنسی آپریشن سنٹر مکمل طور پر فعال ہے اور عوام کسی بھی ہنگامی صورتحال یا اطلاع کے لیے 24/7 ہیلپ لائن 1700 پر رابطہ کر سکتے ہیں۔
.jpeg)
