افغانستان کے ہندوکش خطے میں رات گئے شدید زلزلے کے جھٹکے محسوس کئے گئے۔ امریکی جیولوجیکل سروے کے مطابق زلزلے کی شدت 6.3 اور گہرائی 28 کلو میٹر ریکارڈ کی گئی، جبکہ اس کا مرکز صوبہ سمنگان کے ضلع خُلم سے تقریباً 22 کلو میٹر جنوب مغرب میں تھا۔
خبر ایجنسی کے مطابق زلزلے کے جھٹکے مزار شریف سمیت کئی شہروں میں محسوس کئے گئے، مختلف حادثات میں 7 افراد جاں بحق اور 150 سے زائد زخمی ہوگئے، جبکہ متعدد مکانات کو بھی شدید نقصان پہنچا۔ حکام نے ہلاکتوں میں اضافے کا خدشہ ظاہر کیا ہے۔
عینی شاہدین کے مطابق زلزلے کے دوران شہری خوفزدہ ہو کر گھروں سے باہر نکل آئے۔ اے ایف پی کے مطابق لوگ آدھی رات کو اپنے گھروں سے نکل کر کھلے مقامات کی طرف دوڑنے لگے کیونکہ انہیں خدشہ تھا کہ عمارتیں منہدم ہو سکتی ہیں۔
رپورٹس کے مطابق زلزلے کے جھٹکے ترکمانستان، تاجکستان، ازبکستان اور ایران میں بھی محسوس کئے گئے۔
واضح رہے کہ افغانستان میں اس سے قبل 31 اگست کو 6.0 شدت کے زلزلے میں 2 ہزار سے زائد افراد جاں بحق ہوئے تھے، جبکہ گزشتہ سال 6.3 شدت کے زلزلے اور آفٹر شاکس کے نتیجے میں کم از کم 4 ہزار افراد لقمہ اجل بنے تھے۔
.jpeg)
