وزیر اعلیٰ خیبر پختونخوا سہیل آفریدی نے صوبے بھر میں زیر التوا ایک لاکھ 17 ہزار سے زائد ڈرائیونگ لائسنس کارڈز کی پرنٹنگ ایک ماہ کے اندر مکمل کرنے کی ہدایت جاری کر دی ہے۔
محکمہ ٹرانسپورٹ خیبر پختونخوا نے ڈرائیونگ لائسنس کارڈز کی پرنٹنگ اور ترسیل کے لیے ضلعی بنیادوں پر شیڈول بھی جاری کر دیا ہے۔ اعلامیے کے مطابق متعلقہ حکام کو ہدایت کی گئی ہے کہ طے شدہ تاریخوں کے مطابق لائسنس کارڈز کی بروقت فراہمی یقینی بنائی جائے۔
محکمہ ٹرانسپورٹ کے اعلامیے کے مطابق ہزارہ ڈویژن میں ڈرائیونگ لائسنس کارڈز کی پرنٹنگ جنوری 2026 کے پہلے ہفتے میں مکمل ہو جائے گی۔ مالاکنڈ ڈویژن میں سوات، دیر اور بونیر کے زیر التوا لائسنس جنوری 2026 کے وسط تک فراہم کیے جائیں گے۔
پشاور ڈویژن میں لائسنس کارڈز کی ترسیل 23 سے 26 جنوری 2026 تک مکمل کی جائے گی، جبکہ کوہاٹ ڈویژن میں یہ عمل 29 جنوری 2026 تک مکمل ہونے کی توقع ہے۔ بنوں ڈویژن میں ڈرائیونگ لائسنس کارڈز کی فراہمی 30 جنوری 2026 تک مکمل ہوگی۔
اسی طرح مردان اور ڈی آئی خان ڈویژن میں بھی زیر التوا ڈرائیونگ لائسنس کارڈز کی ترسیل 30 جنوری 2026 تک مکمل کرنے کی ہدایت دی گئی ہے۔
وزیر اعلیٰ خیبر پختونخوا سہیل آفریدی کا کہنا ہے کہ عوام کو سہولیات کی فراہمی موجودہ حکومت کی اولین ترجیح ہے اور اس حوالے سے کسی قسم کی کوتاہی برداشت نہیں کی جائے گی۔
