ملک میں آج سے محدود پیمانے پر فلائٹ آپریشن شروع کیا جائے گا۔ پی آئی اے اور نجی ائیرلائنز آج سے اندرون ملک آپریشن شروع کررہی ہیں جس میں لاہور، اسلام آباد، کراچی، کوئٹہ اور پشاور میں پروازیں چلائی جائیں گی۔
پرواز کی روانگی سے قبل طیارے میں سپرے کے بعد سول ایوی ایشن سے سرٹیفکیٹ لینا لازمی ہوگا، 5 مخصوص ائیرپورٹس پر اندرون ملک روانگی اور آمد پرڈس انفیکٹنٹ سپرے کیا جائے گا۔
ائیرپورٹ سٹاف اور مسافرپارکنگ ایریاز سے آگے نہیں جاسکیں گے اور ہر قسم کا پروٹوکول ختم کر دیا گیا ہے جب کہ کریو کے لیے حفاظتی لباس، این 95 ماسک اور سرجیکل گلوزکا استعمال لازمی ہوگا، اس کے علاوہ مسافروں کوپرواز میں کھانا فراہم نہیں کیا جائے گا۔
دوسری جانب سول ایوی ایشن نے بین الاقوامی پروازوں کی معطلی میں 30 مئی تک توسیع کردی تاہم بیرون ملک 7 ہزار پاکستانیوں کو عید سے پہلے واپس لانے کا اعلان کیا ہے جس کے تحت امریکا سے 12 پروازیں مسافروں کو وطن لائیں گی جب کہ ووہان اور چین میں پھنسے طالبعلموں کو لینے پرواز 18 مئی کو روانہ ہوگی۔
