کراچی اور اسلام آباد میں کورونا کے 2 نئے کیسز سامنے آگئے ہیں جس کے بعد ملک میں متاثرہ افراد کی تعداد 4 ہو گئی۔
وزیراعظم کے معاون خصوصی برائے صحت ڈاکٹر ظفر مرزا نے پریس کانفرنس کے دوران ملک میں مزید 2 نئے کیسز کے سامنے آنے کی تصدیق کی ہے۔
واضح رہے کہ 26 فروری کو پاکستان میں کورونا وائرس کا پہلا کیس رپورٹ ہوا تھا، کراچی میں ایران سے واپس آئے 22 سالہ یحییٰ جعفری میں وائرس کی تصدیق ہوئی تھی۔
اسلام آباد میں معاون خصوصی برائے اطلاعات و نشریات فردوس عاشق اعوان کے ہمراہ پریس کانفرنس کے دوران انہوں نے بتایا کہ ایک کیس سندھ اور ایک اسلام آباد میں رپورٹ ہوا ہے، پہلے رپورٹ ہونے والے مریض تیزی سے صحت یاب ہور ہے ہیں۔
معاون خصوصی نے میڈیا سے درخواست کی کہ وہ مریضوں سے متعلق ان کی ذاتی معلومات نشر کرنے سے گریز کریں اور کہا ‘کورونا وائرس کے حوالے سے کابینہ کا اجلاس 3 گھنٹے جاری رہا تاہم پاکستان میں کورونا وائرس کے حوالے سے کوئی ایمرجنسی نہیں۔’
ڈاکٹر ظفر مرزا نے کہا کہ ایران اور پاکستان کے درمیان فضائی رابطے منقطع ہیں، ہر کسی کو ماسک استعمال کرنے کی ضرورت نہیں ہے۔
کورونا مریض کلیئر قرار؟
دوسری جانب کراچی میں 32 افراد کی ٹیسٹ رپورٹ آئی ہے جس کے مطابق کسی میں کورونا وائرس کی تصدیق نہیں ہوئی جبکہ متاثرہ مریض اور اس کے اہلخانہ کو کلیئر قرار دیدیا جا چکا ہے، کراچی میں متاثرہ نوجوان کے دوستوں، کلاس فیلوز اور اہل خانہ کو ٹیسٹ کے بعد کلیئر قرار دے دیا گیا، تمام کی ٹیسٹ رپورٹ نیگیٹو آگئیں، دو روز میں ڈاو یونیورسٹی ہسپتال میں 32 افراد کے ٹیسٹ کئے گئے تھے۔ محکمہ صحت سندھ کا کہنا ہے کہ شہری خوفزدہ نہ ہوں، صورتحال قابو میں ہے۔
ماسک کہاں سے لیا؟
ادھر سندھ ہائیکورٹ میں اچانک ماسک کی قلت سے متعلق درخواست کی سماعت ہوئی۔ جسٹس محمد علی مظہر نے کہا ماسک تو مل رہے ہیں، کمرہ عدالت میں بھی بچی نے پہنا ہوا ہے۔ جج نے بچی سے کہا بیٹا آپ نے ماسک کہاں سے لیا ہے۔
بچی نے جواب دیا بہت مشکل سے مارکیٹ سے ملا جس پر کمرہ عدالت قہقہوں سے گونج اٹھا، وکیل نے کہا مشکل گھڑی میں لوٹ مار مچائی جا رہی ہے۔ عدالت نے وفاقی حکومت، کمشنر کراچی اور دیگر کونوٹس جاری کرتے ہوئے 6 مارچ کو جواب داخل کرنے کی ہدایت کی ہے۔
نیو اسلام آباد انٹرنیشنل ائیرپورٹ پر جدید تھرمل سکینر نصب
کورونا وائرس کی تشخیص کے لیے نیو اسلام آباد انٹرنیشنل ائیرپورٹ پر جدید تھرمل اسکینر نصب کردیا ہے جو خود کار طریقے سے بخار اور فلو کو چیک کرنے کی صلاحیت رکھتا ہے۔
ذرائع کے مطابق آٹو میٹک تھرمل سکینر کورونا وائرس کی تشخیص کے لیے لگایا گیا ہے،جدید تھرمل سکینر خود کار طریقے سے بخار اور فلو کو چیک کرتا ہے، کم وقت میں زیادہ مسافروں کی سکینگ کی جاسکے گی، سکینر 100 فیصد درستگی کے ساتھ کورونا کے مشتبہ مریضوں کو ڈیٹیکٹ کرنے کی صلاحیت رکھتا ہے۔
ادھر ترجمان سندھ حکومت اور مشیر قانون بیرسٹر مرتضی وہاب نے کہا ہے کہ ایران سے واپس آنے والے زائرین میں سے 600 افراد کی سکریننگ کرکے انہیں کلیئر قرار دے دیا گیا ہے جب کہ حکومت نے سختی سے ذخیرہ اندوزی کی مذمت کی ہے اور کسی کو بھی مہنگے داموں ماسک فروخت کرنے کی اجازت نہیں دی جائے گی۔
سندھ اسمبلی کے کمیٹی روم میں پریس کانفرنس کرتے ہوئے انہوں نے کہا کہ اب تک کراچی میں صرف ایک مریض میں کورونا وائرس کی تشخیص ہوئی ہے جوکہ اب رو بہ صحت ہے اور اس مریض کے تمام اہل خانہ کا طبی معائنہ ہوچکا ہے، الحمدللہ ان میں کسی بھی شخص میں کورونا وائرس کی کوئی علامات نہیں، اب تک 1419 افراد نے ایران کا سفر کیا اور اس میں سے 952 افراد واپس آ چکے ہیں اور 650 افراد کا طبی معائنہ ہوچکا ہے ان میں کورونا وائرس کی علامات نہیں پائی گئیں۔
واضح رہے کہ ایران میں بھی کورونا وائرس کی تباہ کاریاں جاری ہیں اور اس حوالے سے متضاد دعوے سامنے آرہے ہیں۔
انہوں نے کہا کہ سندھ کے تمام اضلاع سے ایران جانے والوں کا ڈیٹا حاصل کر لیا گیا ہے اور حکومت ان افراد کو گھروں تک محدود رکھنے کی ہدایت کر چکی ہے، کورونا وائرس کے حوالے سے بہت پروپیگنڈا کیا جارہا ہے اور ماسک کے حوالے سے شہر میں بے چینی پھیلی ہوئی ہے۔
ترجمان کے مطابق اس سلسلے میں حکومت نے سختی سے ذخیرہ اندوزی کی مذمت کی ہے اور کسی کو بھی مہنگے داموں ماسک فروخت کرنے کی اجازت نہیں دی جائے گی، تمام اضلاع کے ڈپٹی کمشنرز کو ہدایات جاری کردی گئی ہیں اور ذخیرہ اندوزوں کے خلاف سختی سے کریک ڈاؤن کیا جائے گا۔
یہ بھی پڑھیں:
افغانستان میں کورونا وائرس، پاکستان نے طورخم بارڈر پر حفاظتی انتظامات کرلئے
کورونا وائرس کا خدشہ، سعودی عرب نے عمرہ زائرین پر پابندی عائد کر دی
