بنوں میں ایمبولینس اور ڈمپرکے درمیان خوفناک تصادم کے نتیجے میں 5 افراد جاں بحق ہو گئے جبکہ 2زخمی ہوئے۔ المناک حادثہ میرانشاہ روڈ پر تھانہ بکاخیل کی حدود سیدگی چیک پوسٹ کے قریب پیش آیا۔
اطلاعات کے مطابق ریسکیو 1122 کی ایمبولینس گاڑی مریض کو لیکر بنوں آرہی تھی کہ سیدگی چیک پوسٹ کے قریب ایمبولینس گاڑی اور ڈمپر میں تصادم ہوا جس کے نتیجے میں گاڑیوں میں آگ بھڑک اٹھی ۔واقعہ کی اطلاع ملتے ہی پولیس اور ٹی ایم اے بکاخیل فائر بریگیڈ عملہ موقع پر پہنچا جنہوں نے امدادی کاموں میں حصہ لیا ۔
حادثے کے نتیجے میں پانچ افراد حاجی محمد غفران ولد سبحان ، علی خان ولد علی جہان ، احمد اللہ ولد محمد ساکنان ہمزونی میران شاہ ، محمد اعظم شاہ ولد صمد شاہ ساکن میرعلی اور دیر اسمال ولد سخی ساکن مداخیل میران شاہ موقع پر جاں بحق جبکہ قدیم خان ولد کریم خان، غازی جنان ولد سبحان ساکنان ہمزونی میران شاہ زخمی ہو گئے۔
جاں بحق اور زخمیوں کو بنوں ڈی ایچ کیو ہسپتال منتقل کردیا گیا جبکہ فائر بریگیڈ عملہ نے کارروائی کرتے ہوئے آگ پر قابو پالیا۔ جاں بحق افراد میں ریسکیو 1122 کے اہلکار بھی شامل ہیں۔
