مردان، نوشہرہ، کرک، مختلف حادثات و واقعات میں 2 بچوں سمیت 5 افراد جاں بحق
مردان، نوشہرہ اور کرک میں مختلف حادثات اور واقعات میں دو بچوں سمیت 5 افراد جاں بحق جبکہ 5 افراد زخمی ہو گئے۔
ریسکیو 1122 ذرائع کے مطابق مردان رنگ روڈ پر واقع مجاہد خان کلی کے قریب لکڑیوں سے لدہے 2 ٹریکٹر آپس میں ٹکرا گئے، لکڑیاں گرنے سے موٹرسائیکل سوار امجد نامی شخص 2 سالہ بچی سمیت زخمی ہوا جنہیں ابتدائی طبی امداد کی فراہمی کے بعد ڈی ایچ کیو ہسپتال منتقل کر دیا گیا۔
اسی طرح مردان ہی کے علاقے رستم میں چنگے بابا روڈ پر چنگ چی اور تریکٹر ٹرالی کے درمیان تصادم میں دو بچے جاں بحق جبکہ خاتون سمیت چار افراد زخمی ہوئے، ریسکیو 1122 ٹیم نے زخمیوں کو ابتدائی طبی امداد دیتے ہوئے ایم ایم سی منتقل کر دیا۔
بعدازاں نواب نامی زخمی شخص مردان میڈیکل کمپلیکس میں زخموں کی تاب نہ لاتے ہوئے جاں بحق ہوا، زخمی خاتون جاں بحق بچوں کی والدہ جبکہ جاں بحق ہونے والا شخص ان کا والد اور تعلق دیر بالا کے علاقے عشیرئی درہ سے بتایا جاتا ہے۔
دو زخمیوں کی حالت تشویشناک بتائی جارہی ہے۔
دوسری جانب گزشتہ روز نوشہرہ کی تحصیل پبی میں گیس لیکج دھماکے میں شدید جھلس جانے والی 34 سالہ خاتون زخموں کی تاب نہ لاتے ہوئے حیات اباد میڈیکل کمپلیکس پشاور میں جاں بحق ہوگئی۔
یاد رہے کہ لاجبر کالونی میں گیس لیکج دھماکے میں ایک ہی گھر کے سات افراد جھلس گئے تھے
ہسپتال ذرائع کے مطابق زخمیوں کو تشویش ناک حالت میں لایا گیا تھا، زیادہ تر زخمیوں کا ستر سے اسی فیصد جسم جھلس گیا ہے۔
اسی طرح کرک میں ووڈ فیکٹری کے قریب نامعلوم افراد کی فائرنگ سے فیکٹری کا چوکیدار جاں بحق ہو گیا، ملزمان جائے وقوعہ سے فرار ہونے میں کامیاب ہوگئے جبکہ لاش ہسپتال منتقل کر دی گئی۔
