پاکستان سپر لیگ میں ملتان سلطانز اور کراچی کنگز کے درمیان میچ بارش کے باعث بے نتیجہ ختم ہوگیا۔ پاکستان سپر لیگ کا 19واں میچ کراچی کنگز اور ملتان سلطانز کے درمیان لاہور کے قذافی سٹیڈیم میں جاری تھا۔
کراچی کنگز نے ملتان سلطانز کے خلاف ٹاس جیت کر پہلے فیلڈنگ کا فیصلہ کیا اور ملتان نے 17 اووز میں 6 وکٹوں کے نقصان پر 102 رنز بنائے تھے کہ بارش کے باعث میچ روک دیا گیا۔
مسلسل بارش کی وجہ سے میچ دوبارہ شروع نہ ہوسکا اور دونوں ٹیموں کو ایک ایک پوائنٹ دے دیا گیا۔ میچ ختم ہوا تو شاہد آفریدی 17 گیندوں پر 35 اور سہیل تنویر 10 رنز پر کھیل رہے تھے۔
ملتان سلطانز اس وقت پوائنٹس ٹیبل پر پہلے نمبر پر ہے۔ اس نے اب تک 6 میچ کھیلے جس میں ایک میں اسے شکست کا سامنا کرنا پڑا جب کہ چار میں اسے کامیابی حاصل ہوئی اور اس کے 9 پوائنٹس ہیں۔
دوسری جانب کراچی کنگز 6 میچ کھیل کر 7 پوائنٹس کے ساتھ چوتھے نمبر پر ہے۔ اسلام آباد دوسرے اور پشاور تیسرے نمبر پر ہے۔ کوئٹہ پانچویں اور لاہور قلندرز 5 میچز کھیل کر چھٹے یعنی آخری پوزیشن پر ہے۔
