پشاور پولیس نے شہر کے مختلف علاقوں میں جرائم پیشہ افراد کے خلاف دو الگ
الگ کارروائیاں کیں۔
تھانہ کوتوالی پولیس نے لیڈیز پولیس کے ہمراہ کارروائی کرتے ہوئے خواتین کو لوٹنے والی دو خواتین کو گرفتار کر لیا۔ ملزمان تجارتی مراکز میں شاپنگ کے لیے آنے والی خواتین کے پرس، نقدی اور طلائی زیورات چوری کرتی تھیں۔
پولیس نے ان کے قبضے سے 3 لاکھ 80 ہزار روپے نقد برآمد کر لیے ہیں۔ اس حوالے سے 2 جنوری 2026 کو تھانہ کوتوالی میں مقدمہ درج کیا گیا تھا، جبکہ مزید تفتیش جاری ہے۔
دوسری جانب تھانہ چمکنی پولیس نے گزشتہ رات کارروائی کرتے ہوئے اسلحہ کی نوک پر شہریوں کو لوٹنے والے خطرناک سنیچرز عمران عرف خامار، عبداللہ اور فریاد کو پولیس مقابلے کے بعد زخمی حالت میں گرفتار کر لیا۔
پولیس کے مطابق ملزمان نے فرار ہونے کی کوشش میں فائرنگ کی تاہم اپنے ہی ساتھیوں کی فائرنگ سے زخمی ہو گئے۔ پولیس نے ملزمان کے قبضے سے سنیچ شدہ موبائل فون، موٹر سائیکل اور اسلحہ برآمد کر لیا ہے، جبکہ مزید تحقیقات جاری ہیں۔
پولیس حکام کے مطابق دونوں کارروائیاں ایس پی سٹی ڈویژن شاہد عدنان کی نگرانی میں کی گئیں، اور شہر میں جرائم پیشہ عناصر کے خلاف کارروائیاں مزید تیز کی جائیں گی۔
