پاک فوج کے شعبہ تعلقات عامہ (آئی ایس پی آر) کے مطابق 13 سے 15 اکتوبر 2025 کے دوران خیبر پختونخوا کے مختلف علاقوں میں سیکیورٹی فورسز کے ساتھ جھڑپوں میں بھارتی ایجنسیوں کے زیر اثر دہشتگرد تنظیم ’الخوارج‘ سے تعلق رکھنے والے 34 دہشت گرد مارے گئے۔
ترجمان آئی ایس پی آر نے بتایا کہ شمالی وزیرستان کے علاقے سپین وام میں خفیہ اطلاعات کی بنیاد پر آپریشن کیا گیا، جس دوران دہشتگردوں کے ٹھکانے کو مؤثر طریقے سے نشانہ بنایا گیا۔ شدید فائرنگ کے تبادلے میں 18 دہشتگرد ہلاک ہو گئے۔
بیان کے مطابق ایک اور انٹیلی جنس بیسڈ آپریشن جنوبی وزیرستان میں کیا گیا، جہاں سیکیورٹی فورسز اور دہشت گردوں کے درمیان جھڑپ کے دوران 8 دہشت گرد مارے گئے۔
اسی طرح ضلع بنوں میں بھی فائرنگ کا تبادلہ ہوا، جس کے نتیجے میں مزید 8 دہشت گرد ہلاک ہوئے۔
آئی ایس پی آر کا کہنا ہے کہ کارروائیوں کے بعد علاقوں میں سینیٹائزیشن آپریشن جاری ہے تاکہ بھارتی حمایت یافتہ دہشتگردوں کے ممکنہ ٹھکانے ختم کئے جا سکیں۔
ترجمان کے مطابق سیکیورٹی فورسز اور قانون نافذ کرنے والے ادارے ’عزمِ استحکام‘ کے وژن کے تحت انسداد دہشت گردی کی مہم پوری قوت سے جاری رکھے ہوئے ہیں، تاکہ ملک سے بیرونی حمایت یافتہ دہشتگردی کے ناسور کو ہمیشہ کے لیے ختم کیا جا سکے۔
