ضلع خیبر کی تحصیل جمرود میں واقع نجی سکول میں کھلونا بم پھٹنے سے چار طلبہ زخمی ہو گئے۔ واقعہ اس وقت پیش آیا جب چہارم جماعت کے ایک طالب علم نے راستے سے ملنے والا کھلونا بم سکول لے آیا۔
سکول کے پرنسپل کے مطابق، طالب علم نے کلاس میں کھیل کے دوران کھلونا بم زمین پر مارا جس کے نتیجے میں وہ اچانک پھٹ گیا۔
دھماکے سے چار بچے زخمی ہوئے جنہیں فوری طور پر حیات آباد میڈیکل کمپلیکس منتقل کیا گیا۔
پرنسپل کے مطابق تمام زخمی بچوں کو ابتدائی طبی امداد فراہم کرنے کے بعد گھروں کو روانہ کر دیا گیا ہے اور ان کی حالت خطرے سے باہر ہے۔
ایس ایچ او جمرود نے واقعے کی تصدیق کرتے ہوئے کہا کہ پولیس جائے وقوعہ کا معائنہ کر رہی ہے اور معاملے کی تحقیقات شروع کر دی گئی ہیں تاکہ کھلونا بم کے ماخذ کا پتہ لگایا جا سکے۔
