بلوچستان، سکیورٹی فورسز نے ضلع شیرانی میں انٹیلی جنس بیسڈ آپریشن (IBO) کے دوران بھارتی حمایت یافتہ تنظیم فتنہ الخوارج کے سات دہشتگردوں کو ہلاک کر دیا۔

پاک فوج کے شعبہ تعلقات عامہ (آئی ایس پی آر) کے مطابق دہشت گردوں کی موجودگی کی اطلاع پر فورسز نے آپریشن کیا۔ فائرنگ کے شدید تبادلے کے بعد سات دہشتگرد مارے گئے۔ کارروائی میں دہشت گردوں کے ٹھکانے کو بھی مؤثر انداز میں نشانہ بنایا گیا جبکہ بڑی مقدار میں اسلحہ، گولہ بارود اور دھماکا خیز مواد برآمد ہوا۔

وزیر داخلہ محسن نقوی نے فورسز کی بروقت کارروائی کو سراہتے ہوئے کہا کہ “سکیورٹی فورسز نے دشمن کے مذموم عزائم خاک میں ملا دیے۔ ہم بہادر جوانوں کو سلام پیش کرتے ہیں۔ بلوچستان میں قیامِ امن کے لیے فورسز کی قربانیاں اور کامیابیاں پوری قوم قدر کی نگاہ سے دیکھتی ہے۔”

ان کا مزید کہنا تھا کہ پوری قوم دہشت گردی کے خلاف جنگ میں سکیورٹی فورسز کے ساتھ کھڑی ہے۔

واضح رہے کہ چند روز قبل بھی سکیورٹی فورسز نے کوئٹہ کے نواحی علاقے غزہ بند میں کارروائی کر کے 10 دہشت گردوں کو ہلاک کیا تھا۔