وزیر اعلیٰ خیبرپختونخوا علی امین خان گنڈاپور کی زیرِ صدارت صوبائی کابینہ کا 38واں اجلاس منعقد ہوا، جس میں عوامی فلاح، صحت، امن و امان، سیاحت، جنگلات اور دیگر شعبوں سے متعلق اہم فیصلے کئے گئے۔
اجلاس میں صوبائی حکومت کے لیے کمیونیکیشن اسٹریٹجی کی منظوری دی گئی جبکہ باجوڑ کے بے گھر خاندانوں کے لیے پی ڈی ایم اے کو 1247.5 ملین روپے کی گرانٹ کی منظوری دی گئی۔ پشاور میں ملک سعد شہید پولیس لائن کی دوبارہ تعمیر اور نئے تھانے و چوکیوں کے قیام کی منظوری دی گئی، جبکہ اکبرپورہ نوشہرہ میں بھی تھانہ قائم کرنے کے لیے زمین فراہم کرنے کی منظوری دی گئی۔
صوابی کی سب جیل کو ڈسٹرکٹ جیل کا درجہ دیا گیا اور قیدیوں و پوسٹوں کی منتقلی کی منظوری دی گئی۔ مانسہرہ کے اوگی ہسپتال کو کیٹیگری-ڈی ہسپتال میں اپ گریڈ کرنے کا فیصلہ کیا گیا۔ کالاش اور بہائی برادری کے تہواروں کے لیے گرانٹ دی گئی اور بی آر ٹی کے لیے مزید 50 بسوں کی خریداری کی منظوری دی گئی۔
نوشہرہ میں ملک کے سب سے بڑے سفاری پارک کے قیام اور ٹانک کے بند پیرو میں 14,718 ایکڑ زمین پر جنگلات اگانے کی منظوری دی گئی۔ چشمہ ریسٹ ہاؤس ڈیرہ اسماعیل خان کی تاریخی عمارت کو محکمہ آثار قدیمہ کے حوالے کرنے کی بھی منظوری دی گئی۔ اسلام آباد میں خیبرپختونخوا آرٹس اینڈ کرافٹس ڈسپلے سنٹر قائم کرنے کا فیصلہ بھی کیا گیا۔
اجلاس میں ڈیم والے اضلاع کے نیٹ ہائیڈل پراجیکٹ کا حصہ 10 فیصد سے بڑھا کر 15 فیصد کیا گیا۔ ہیلتھ کیئر کمیشن اور ویمن کمیشن رولز میں ترامیم کی منظوری دی گئی جبکہ اسٹامپ ایکٹ 1899 میں بھی ترامیم کی گئی۔ کم از کم اجرت 36 ہزار روپے سے بڑھا کر 40 ہزار روپے ماہانہ کردی گئی۔
ڈیرہ اسماعیل خان میں نادرا آفس کے قیام کے لیے عمارت فراہم کی جائے گی۔ ڈی آئی خان میں گردے کی ٹرانسپلانٹ کے لیے ایک مریض کو 60 لاکھ روپے امداد دی جائے گی۔ اسلام آباد نیشنل یوتھ گیمز 2025 میں صوبائی دستہ شرکت کرے گا اور اس کے لیے فنڈز کی منظوری دی گئی۔
اسکے علاوہ افغانستان کے زلزلہ متاثرین کے لیے دس کروڑ روپے امداد کی منظوری دی گئی۔
اجلاس میں گندم اور اجناس کی صورتحال پر بریفنگ دی گئی، صوبے میں گندم کے ذخائر اطمینان بخش قرار پائے اور مزید خریداری ضرورت کے مطابق کی جائے گی۔
اجلاس کے اختتام پر صوبائی وزرا اور ارکان نے ملک میں سیلاب اور افغانستان میں زلزلے سے جاں بحق افراد کے درجات کی بلندی اور زخمیوں کی جلد صحتیابی کے لیے خصوصی دعا کی۔
