حالیہ بارشوں کے باعث پشاور کے مختلف علاقوں میں سیلابی صورتحال پیدا ہوگئی ہے۔ پی ڈی ایم اے کی رپورٹ کے مطابق بڈنی نالہ درمنگی کے مقام پر پانی کا اخراج 11 ہزار 900 جبکہ پیر بالا کے مقام پر 9 ہزار کیوسک سے تجاوز کر گیا ہے۔ مختلف مقامات پر پانی کی سطح میں مسلسل اضافہ ریکارڈ کیا جا رہا ہے، جس سے درمیانے درجے کا سیلاب پیدا ہوا ہے۔
پی ڈی ایم اے اور ضلعی انتظامیہ نے صورتحال پر کڑی نظر رکھنے کے ساتھ ساتھ تمام وسائل کو ہائی الرٹ کر دیا ہے۔ متعلقہ ادارے آپس میں مسلسل رابطے میں ہیں جبکہ ریسکیو ٹیموں کو بھی الرٹ کر دیا گیا ہے۔
پی ڈی ایم اے کے مطابق بڈنی نالہ میں شدید اخراج کے باعث نشیبی علاقے متاثر ہو سکتے ہیں۔ نالے کے قریب رہنے والی آبادی کی محفوظ مقامات پر منتقلی جاری ہے۔ عوام کو ہدایت کی گئی ہے کہ مقامی ندی نالوں اور دریاؤں سے دور رہیں جبکہ ضلعی انتظامیہ نے عوام کو باخبر رکھنے کے لیے مساجد میں اعلانات کا سلسلہ شروع کر رکھا ہے۔
ترجمان پی ڈی ایم اے کے مطابق ایمرجنسی آپریشن سنٹر مکمل طور پر فعال ہے اور عوام کسی بھی ناخوشگوار واقعے کی اطلاع ہیلپ لائن 1700 پر دے سکتے ہیں۔
