وزیراعلیٰ علی امین گنڈاپور کی ہدایت پر خیبرپختونخوا میں شہداء اور متاثرین میں معاوضوں کی تقسیم کا سلسلہ جاری ہے۔ معاونِ خصوصی اطلاعات بیرسٹر ڈاکٹر سیف کے مطابق اب تک 332 شہداء کے لواحقین میں 664 ملین روپے کے چیکس تقسیم کئے جا چکے ہیں۔
ان کا کہنا تھا کہ صرف بونیر کے 171 شہداء کے لواحقین کو 342 ملین روپے کے چیکس دیے گئے ہیں، جبکہ زخمیوں میں 19.5 ملین روپے کے چیکس تقسیم ہو چکے ہیں۔
بیرسٹر ڈاکٹر سیف نے مزید بتایا کہ سیلاب میں مکمل اور جزوی طور پر متاثرہ گھروں کے معاوضوں کی ادائیگی بھی شروع ہو چکی ہے۔ اس حوالے سے مکمل تباہ گھروں کے مالکان کو 58 ملین روپے اور جزوی طور پر متاثرہ 39 گھروں کے مالکان کو 14.5 ملین روپے کے چیکس فراہم کئے گئے ہیں۔
انہوں نے کہا کہ گھروں کے معاوضے کی تقسیم کا عمل مزید تیز کیا جائے گا جبکہ ڈیجیٹل ایپ کے ذریعے متاثرہ افراد کو فوڈ اسٹامپ کی صورت میں 15 ہزار روپے دیے جا چکے ہیں۔
بیرسٹر ڈاکٹر سیف نے کہا کہ وزیراعلیٰ کی قیادت میں صوبائی حکومت متاثرہ افراد کے شانہ بشانہ کھڑی ہے اور تمام متاثرہ خاندانوں کو معاوضوں کی بروقت ادائیگی یقینی بنائی جائے گی۔
.jpeg)
