وادی تیراہ کے علاقہ تورہ ویلا میں مضر صحت خوراک کھانے سے ایک کمسن بچی جاں بحق جبکہ مزید 16 بچے غیر معمولی حالت میں ہسپتال منتقل کر دیے گئے۔
ذرائع کے مطابق واقعہ گزشتہ شب پیش آیا جب اختر عالم اور زرمت کے گھر میں کھانے کے دوران خوراکی اشیاء میں غلطی سے زہر آلود دوا شامل ہوگئی، جو کھڑی فصل کو نقصان پہنچانے والے جنگلی سور کو مارنے کے لیے لائی گئی تھی۔ خوراک کھانے کے بعد بچوں کی حالت اچانک بگڑ گئی جبکہ بڑی عمر کے افراد نقصان سے محفوظ رہے۔
متاثرہ بچوں کو فوری طور پر ڈوگرہ اسپتال منتقل کیا گیا جبکہ چند بچوں کو بعد ازاں حیات آباد میڈیکل کمپلیکس پشاور بھیج دیا گیا۔ ہسپتال انتظامیہ کے مطابق جاں بحق بچی اسپتال پہنچنے سے قبل ہی دم توڑ چکی تھی۔
ڈوگرہ ہسپتال کے میڈیکل سپرنٹنڈنٹ ڈاکٹر عالمگیر وزیر نے بتایا کہ متاثرہ بچوں کو فوری طبی امداد فراہم کی گئی، جن میں سے بیشتر کو صحت یاب ہونے کے بعد گھر بھیج دیا گیا ہے، جبکہ باقی بچوں کی حالت بھی اب خطرے سے باہر ہے۔
دوسری جانب اسسٹنٹ کمشنر باڑہ اور تحصیلدار باڑہ نے ڈوگرہ ہسپتال کا دورہ کیا اور علاج معالجے کی صورتحال کا جائزہ لیا۔
