پشاور انسٹیٹیوٹ آف کارڈیالوجی (پی آئی سی) نے جشنِ آزادی کے موقع پر پاکستان کے لیے ایک تاریخی اعزاز حاصل کرتے ہوئے ایک ہی دن میں 14 ٹرانس کیتھیٹر آؤٹک والو امپلانٹیشن (ٹاوی) سرجریاں مکمل کر کے عالمی ریکارڈ قائم کر دیا۔ اس سے قبل یہ ریکارڈ سربیا کے پاس تھا، جس نے ایک دن میں 13 سرجریاں کی تھیں۔
میڈیکل ڈائریکٹر پی آئی سی ڈاکٹر علی رضا کے مطابق، ان تمام مریضوں کی اوپن ہارٹ سرجری ممکن نہیں تھی اور ٹاوی طریقہ علاج کے ذریعے 70 سے 80 سال کے مریضوں کو نئی زندگی دی گئی۔ ڈاکٹر عابداللہ، سربراہ شعبہ کارڈیالوجی، نے کہا کہ یہ کامیابی ماہر ٹیم کی شب و روز کی محنت کا نتیجہ ہے۔
ڈین پی آئی سی پروفیسر ڈاکٹر شاہکار احمد شاہ نے بتایا کہ اس ریکارڈ ساز آپریشن میں پاکستان کے بڑے ہسپتالوں کے کارڈیالوجسٹ، کارڈیک سرجنز، کیتھ لیب اور آپریشن تھیٹر اسٹاف، ٹیکنالوجسٹ، اینستھیزیا ٹیم، نرسنگ اور دیگر معاون عملے نے بھرپور شرکت کی۔ ان کا کہنا تھا کہ عالمی معیار کی سہولیات اور مہارت کے ساتھ یہ پاکستان کے طبی شعبے میں ایک اہم سنگِ میل ہے۔
مشیر صحت خیبرپختونخوا احتشام علی نے پی آئی سی کی اس شاندار کامیابی پر ٹیم کو مبارکباد پیش کرتے ہوئے اسے ملکی وقار میں اضافے کا باعث قرار دیا اور کارکردگی پر توصیفی اسناد دینے کا اعلان کیا۔
