مردان بورڈ نے میٹرک نتائج کا اعلان کر دیا، کامیابی کا تناسب 75.27 فیصد رہا

عبدالستار

 بورڈ آف ایلیمنٹری اینڈ سیکنڈری ایجوکیشن مردان نے میٹرک سالانہ امتحانات 2024 کے نتائج کا اعلان کر دیا ہے۔ مجموعی طور پر 76 ہزار 900 طلباء و طالبات نے امتحان میں شرکت کی، جن میں سے 57 ہزار 880 کامیاب قرار پائے، یوں کامیابی کا تناسب 75.27 فیصد رہا۔

نتائج کے موقع پر مردان بورڈ کے آڈیٹوریم میں ایک خصوصی تقریب منعقد ہوئی جس میں کمشنر مردان نثار احمد اور چیئرمین بورڈ پروفیسر جہانذیب نے پوزیشن ہولڈرز طلباء و طالبات میں انعامات تقسیم کئے۔

پوزیشن ہولڈرز میں دی قائداعظم پبلک اسکول مردان کے طالب علم محمد اطہر خان نے 1177 نمبر حاصل کر کے مجموعی طور پر پہلی پوزیشن حاصل کی۔ دوسری پوزیشن 1172 نمبر حاصل کرنے والی تین طالبات کے حصے میں آئی، جن میں دی قائداعظم گرلز سکول صوابی کی سدرہ احمد، غزالی سکول مردان کی روزہ سراج اور ثانیہ فلک شامل ہیں۔

تیسری پوزیشن 1170 نمبر کے ساتھ تین طلبہ و طالبات نے مشترکہ طور پر حاصل کی۔ ان میں دی قائداعظم گرلز پبلک سکول صوابی کی عروسہ انور، اقراء سکول چارگلی کے خاقان احمد اور غزالی سکول فار گرلز مردان کی اقصیٰ رحمان شامل ہیں۔

چیئرمین بورڈ پروفیسر جہان زیب نے خطاب کرتے ہوئے کہا کہ محض نمبر لینا کافی نہیں، اصل کامیابی مسلسل محنت کو جاری رکھنے میں ہے۔ انہوں نے طلباء و طالبات پر زور دیا کہ وہ تعلیم کو اپنا مشن بنائیں اور آگے بڑھتے رہیں۔

رپورٹ کے مطابق امتحانات میں 19 ہزار 20 طلباء و طالبات فیل بھی ہوئے ہیں۔