انسداد کورونا کے اقدامات میں حکومت اور حکومتی اداروں کے شانہ بشانہ فرائض سرانجام دیتے ہوئے پاک فوج نے پہلی قربانی دیدی۔
پاک فوج کے شعبہ تعلقات عامہ (آئی ایس پی آر) کے مطابق میجر محمد اصغر پاک افغان سرحد پر تعینات اور کورونا وائرس کا شکار ہو گئے تھے، سانس میں تکلیف پر سی ایم ایچ پشاور منتقل اور وینٹی لیٹر پر رکھے گئے تاہم جانبر نہ ہوسکے۔
Major Muhammad Asghar laid his life in the line of duty at #Torkham border in fight against #COVID-19. Evacuated to CMH Peshawar with breathing problems, was put on ventilator but succumbed to Corona Virus. There is no cause bigger than serving the Nation.#OurMartyrsOurHeroes pic.twitter.com/3mtCKyRycq
— DG ISPR (@OfficialDGISPR) May 10, 2020
ٹوئٹر پر جاری پیغام میں آئی ایس پی آر کے سربراہ میجر جنرل افتخار نے میجر محمد اصغر کو شہید قرار دیتے ہوئے کہا کہ شہید میجر نے فرض کی راہ میں جان دی ہے، قوم کی خدمت سے بڑا کوئی فرض نہیں اور ہمارے شہداء ہی ہمارے اصل ہیروز ہیں۔
واضح رہے کہ ملک بھر میں کورونا وائرس کے اب تک 30 ہزار 9 سو سے زائد مصدقہ کیسز سامنے آئے ہیں، 666 افراد نے کورونا وائرس کی وجہ سے موت کو گلے لگایا ہے جن میں سب سے زیادہ 245 خیبر پختونخوا میں جاں بحق ہوئے ہیں۔
یہ بھی واضح رہے کہ ملک بھر میں بڑی تیزی سے کورونا وائرس کے نئے کیسز کے ساتھ ساتھ اموات کی شرح میں اضافہ دیکھنے میں آ رہا ہے اور اب تک ممبران قومی و صوبائی اسمبلی سے لے کر انتظامیہ کے افسران، پی آئی اے کے اہلکاروں، پولیس اور سب سے بڑھ کر ڈاکٹرز اور دیگر میڈیکل سٹاف سمیت مختلف شعبہ ہائے زندگی سے تعلق رکھنے والے افراد اس موذی مرض کی زد میں آئے ہیں۔
