ملک میں پولیو کے مزید دو کیسز سامنے آگئے جس کے بعد رواں سال کی کل تعداد 41 ہو گئی۔
نیشنل انسٹیٹیوٹ آف ہیلتھ (این آئی ایچ) کے مطابق سندھ اور بلوچستان میں ایک ایک نیا کیس سامنے آیا ہے۔
سندھ کے ضلع خیرپور کی تحصیل کنگری میں 14 ماہ کے بچے میں پولیو وائرس کی تصدیق ہوئی، حکام کا کہنا تھا کہ ‘بلوچستان کے ضلع پشین کی یونین کونسل بازار کونا میں 8 ماہ کے بچے میں پولیو وائرس کی تصدیق ہوئی’۔
انہوں نے بتایا کہ ‘بچے کے ہاتھ پیر مفلوج ہوگئے ہیں، وہ ایک غریب خاندان سے تعلق رکھتا ہے اور اس کے والد کسان ہیں۔’
خیال رہے کہ پولیو ایک انتہائی معتدی مرض ہے جو زیادہ تر 5 سال تک کی عمر کے بچوں کو اپنا شکار بناتا ہے، یہ اعصابی نظام پر اثر انداز ہو کر معذوری بلکہ موت کا سبب بھی بن سکتا ہے۔
پولیو کا اب تک کوئی علاج دریافت نہیں ہوا البتہ ویکسینیشن بچوں کو اس بیماری سے محفوظ رکھنے کا سب سے موثر طریقہ ہے۔
ہر مرتبہ جب ایک بچے کو پولیو کے قطرے پلائے جاتے ہیں تو وائرس سے اس کی حفاظت میں اضافہ ہو جاتا ہے، دنیا میں صرف دو ممالک، پاکستان اور افغانستان، ہیں جہاں سے اس وائرس کا خاتمہ نہیں ہو سکا ہے۔
پاکستان پر عالمی ادارہ صحت کی جانب سے پولیو سے متعلق سفری پابندیاں بھی عائد ہیں جو بیرون ملک سفر کرنے والے ہر شہری کو ویکسی نیشن کا سرٹفکیٹ دکھانا لازمی قرار دیتا ہے۔
یاد رہے کہ 30 مارچ کو خیبر پختونخوا میں پولیو کے مزید 3 کیسز کی تصدیق ہوئی تھی جس کے بعد صوبے میں رواں برس یہ تعداد 18 اور ملک میں 36 ہو گئی۔
ایمرجنسی آپریشن سنٹر (ای او سی) کے کوآرڈینیٹر عبدالباسط کا کہنا تھا کہ خیبرپختونخوا میں پولیو کےتین نئے کیسز سامنے آگئے ہیں جو ضلع کرک، لکی مروت اور ٹانک سے رپورٹ ہوئے تھے۔
