خیبرپختونخوا میں شدید گرمی کا راج، بالائی علاقوں میں بارش کی امید

محکمہ موسمیات کے مطابق پشاور اور خیبرپختونخوا کے بیشتر اضلاع میں موسم شدید گرم اور خشک رہنے کا امکان ہے، جبکہ بعض بالائی علاقوں میں ہلکی بارش کی پیشگوئی بھی کی گئی ہے۔

محکمہ موسمیات کے مطابق پشاور کا مطلع صاف ہے اور موسم بدستور شدید گرم ہے۔ شہر میں کم سے کم درجہ حرارت 23 ڈگری سینٹی گریڈ ریکارڈ کیا گیا، جبکہ دن کے اوقات میں پارہ 46 ڈگری سینٹی گریڈ تک جانے کا امکان ظاہر کیا گیا ہے۔ ہوا میں نمی کا تناسب 38 فیصد ہے، جو گرمی کی شدت میں اضافے کا باعث بن سکتا ہے۔

بنوں میں صوبے کا سب سے زیادہ درجہ حرارت 47 ڈگری سینٹی گریڈ ریکارڈ کیا گیا، جو کہ موجودہ ہیٹ ویو کی شدت کی عکاسی کرتا ہے۔ محکمہ موسمیات نے پیشگوئی کی ہے کہ صوبے کے بیشتر میدانی اضلاع میں موسم شدید گرم رہے گا، جبکہ چترال، اپر دیر، سوات اور کوہستان کے بعض مقامات پر ہلکی بارش کا امکان بھی موجود ہے۔

شہریوں کو شدید گرمی میں غیر ضروری باہر نکلنے سے گریز، پانی کا زیادہ استعمال، اور احتیاطی تدابیر اختیار کرنے کی ہدایت کی گئی ہے۔