خیبرپختونخوا کے مختلف اضلاع میں بارش اور ژالہ باری کا امکان، موسم جزوی ابرآلود رہے گا

خیبرپختونخوا کے بیشتر اضلاع میں آئندہ 24 گھنٹوں کے دوران موسم جزوی طور پر ابرآلود رہے گا، جبکہ مختلف علاقوں میں گرج چمک کے ساتھ بارش اور چند مقامات پر ژالہ باری کا امکان ظاہر کیا گیا ہے۔

محکمہ موسمیات کے مطابق، صوبے کے جنوبی اضلاع میں دن کے اوقات میں موسم گرم رہنے کا امکان ہے۔ تاہم، چترال، دیر، سوات، شانگلہ، بونیر، مالاکنڈ، باجوڑ، ایبٹ آباد، مانسہرہ، ہری پور، بٹگرام، کوہستان، تورغر، مہمند، خیبر، کرم اور اورکزئی کے علاقوں میں بارش کے ساتھ ساتھ ژالہ باری کا بھی امکان ہے۔

گزشتہ روز سوات، دیر، چترال، کوہستان، نوشہرہ، باجوڑ اور خیبر کے مختلف علاقوں میں بارش ہوئی، جہاں سب سے زیادہ بارش چراٹ میں 40 ملی میٹر ریکارڈ کی گئی۔ اس کے علاوہ دیر میں 15 ملی میٹر، مالم جبہ میں 11 ملی میٹر، پٹن میں 10 ملی میٹر جبکہ کالام میں 9 ملی میٹر بارش ریکارڈ ہوئی۔

محکمہ موسمیات کے مطابق، پشاور میں آج کم سے کم درجہ حرارت 21 ڈگری سینٹی گریڈ ریکارڈ کیا گیا، جبکہ زیادہ سے زیادہ درجہ حرارت 35 ڈگری سینٹی گریڈ تک جانے کا امکان ہے۔ دیگر بالائی علاقوں میں بھی موسم خنک رہا، جہاں کالام کا درجہ حرارت 7، مالم جبہ کا 8 اور دیر کا 9 ڈگری سینٹی گریڈ ریکارڈ کیا گیا۔