ملالہ نے غزہ کے بچوں کی امداد کیلیے ڈیڑھ لاکھ ڈالر عطیہ کردیے
خیبر پختونخوا کے علاقے سوات سے تعلق رکھنے والی نوبل انعام یافتہ پاکستانی طالبہ ملالہ یوسف زئی نے غزہ کے متاثرہ بچوں کے لیے ڈیڑھ لاکھ ڈالر عطیہ کرنے کا اعلان کیا ہے۔
ملالہ یوسف زئی کی جانب سے یہ رقم غزہ اور فلسطین کے دیگر علاقوں میں کام کرنے والی این جی اوز کو دی جائے گی جو کہ غزہ میں بچوں کی فلاح کے لیے استعمال ہوگی۔
یہ رقم غزہ میں حالیہ اسرائیلی بمباری سے تباہ اسکولوں کی تعمیر، غذائی کمی کا شکار بچوں کی امداد اور صاف پانی سمیت دیگر منصوبوں پر خرچ ہوگی۔
Palestinian children deserve to live in peace, to feel safe in their homes, to be educated and to pursue their dreams. I'm proud to stand with them and support them. Please join me in donating to: @savechildrenuk, @KinderUSA and @DCIPalestine.https://t.co/W2MTnYoFXU
— Malala Yousafzai (@Malala) May 27, 2021
ایک ٹوئٹ میں ملالہ کا کہنا تھا کہ فلسطینی بچے بھی امن کے ساتھ رہنے اور اپنے گھروں میں محفوظ محسوس کرنے سمیت تعلیم یافتہ ہونے اور اپنے خوابوں کی تعبیر کے مستحق ہیں۔
ملالہ یوسف زئی کا کہنا تھا کہ مجھے فلسطینی بچوں کے ساتھ کھڑے ہونے اور ان کا ساتھ دینے پر فخر ہے۔
خیال رہے غزہ پر حملوں کے نتیجے میں 66 بچے جاں بحق اور درجنوں زخمی ہوئے ہیں جب کہ 50 سے زیادہ اسکول بھی تباہ ہوئے ہیں۔
