پشاور سمیت خیبر پختونخوا کے مختف اضلاع میں گیس لیکج اور سلینڈر دھماکوں سمیت متعدد واقعات میں ایک پانچ سالہ بچے سمیت دو افراد جاں بحق جبکہ 14 افراد زخمی ہو گئے جن میں خواتین اور بچے بھی شامل ہیں۔
جمعہ کے روز پشاور کے علاقے دلزاک روڈ مومن ٹاون میں گیس لیکج سے گھر میں دھماکہ کے نتیجے میں 2 بچوں سمیت 6 افراد زخمی ہوئے۔ امدادی ٹیموں نے موقع پر پہنچ کر زخمیوں کو فوری طبی امداد کیلئے لیڈی ریڈنگ ہسپتال منتقل کیا، ہسپتال انتظامیہ کے مطابق زخمیوں کی حالت خطرے سے باہر ہے۔
ادھر ڈی آئی خان میں زکوڑی فلنگ سٹیشن کے قریب تیز رفتار گاڑی کی ٹکر سے ایک بھائی جاں بحق جبکہ دوسرا شدید زخمی ہو گیا جسے تشویشناک حالت میں طبی امداد کیلئے ہسپتال منتقل کر دیا گیا۔
ڈیرہ پولیس کے مطابق تھانہ یارک کی حدود میں زکوڑی فلنگ سٹیشن کے قریب تیز رفتار گاڑی نے موٹر سائیکل سوار دو بھائیوں کو ٹکر مار دی جس کے نتیجے میں عطاء الرحمن مروت موقع پر ہی جاں بحق جبکہ اس کا بھائی سیف الرحمن مروت شدید زخمی ہو گیا۔
یارک پولیس نے متوفی عطاء الرحمن کے بھائی کی رپورٹ پر اس واقعہ کا مقدمہ درج کر لیا۔
