مردان میں سابقہ دشمنی پرپیشی بھگتنے کے بعد عدالت سے واپس جانے والے 3افراد کو فائرنگ کرکے قتل کردیا گیا جبکہ ملزمان واردات کے بعد فرار ہونے میں کامیاب ہوگئے، پولیس نے مقدمہ درج کرکے تفتیش شروع کردی ہے۔
ہسپتال پولیس کو رپورٹ درج کراتے ہوئے جواد خان نے بتایا کہ ہم مردان عدالت میں پیشی سے واپس جارہے تھے کہ مقتولین حسین،اویس اورہمتاج ایک موٹرسائیکل پر آگے جارہے تھے اور میں پیچھے دوسری موٹرسائیکل پر جارہا تھا اس دوران طورو چوک مردان میں ملزمان عالم زیب،عالمگیراورظہورساکنان گڑھی کپورہ کی نشاندہی پر ملزمان ارشد،حماد زادہ اورعمیر نے گاڑی سے اتر کر موٹرسائیکل سوار حسین،اویس اور ہمتاج پر فائرنگ کردی جس سے تینوں لگ کر موقع پر جاں بحق ہوگئے جبکہ ملزمان واردات کے بعد فرار ہوگئے۔
وجہ عناد ملزمان کے ساتھ سابقہ دشمنی بتائی گئی پولیس نے مقدمہ درج کرکے تفتیش شروع کردی۔
شمالی وزیرستان میں نامعلوم افراد کے ہاتھوں خاتون قتل
دوسری جانب شمالی وزیرستان کے میرعلی سب ڈویژن میں نامعلوم افراد کی فائرنگ سے خاتون جاں بحق ہوگئی۔
پولیس کے مطابق فائرنگ کے نتیجے میں زوجہ عبدالصبور جاں بحق ہوگئی، پولیس کے مطابق خاتون اپنے کھیتوں سے گاس کھاٹ کر گھر لے جارہی تھی کہ نامعلوم افراد نے موٹرسائیکل پر آکر خاتون پر فائرنگ شروع کی۔
ملزمان فرار ہونے میں کامیاب ہوگئے جبکہ پولیس نے موقع پر پہنچ کر تفتیش شروع کردی۔
