بولی وڈ اسٹار شاہ رخ خان کی کزن 54 سالہ نورجہاں طویل عرصے تک بیمار رہنے کے بعد انتقال کر گئیں۔
سیاسی لحاظ سے انتہائی سرگرم خاتون نورجہاں نے سال 2018 کے عام انتخابات میں آزاد حیثیت سے حصہ لیاتھا تاہم انہوں نے کاغذات نامزدگی واپس لے لیے تھے اورالیکشن سے دست بردارہوگئی تھیں۔ نور جہاں قبل ازیں ڈسٹرک اور ٹاؤن کونسلر کی حیثیت سے بھی فرائض سرانجام دے چکی تھیں۔
نورجہاں قصہ خوانی بازار سے ملحقہ شاہ ولی قتال میں اپنے آبائی گھر میں مقیم تھیں جہاں بچپن میں شاہ رخ خان اپنے والدین کے ساتھ دو مرتبہ ان سے ملنے پشاور آئے تھے جبکہ دو مرتبہ نورجہاں عرف منی بھی اپنے چچا زاد بھائی شاہ رخ سے ملنے بھارت گئی تھیں۔
پشاور سے کئی بار ان گنت تحفے انہوں نے اپنے کزن شاہ رخ خان کے نام بھارت بھیجے جبکہ ہر سال شاہ رخ خان کی سالگرہ کی تقریب بھی مناتی رہیں جس سے ان کو عالمی اور پاکستانی میڈیا پر پذیرائی ملی۔
نورجہاں سے ملنے کے لئے شاہ رخ خان نے پشاور آنے کا وعدہ کیا تھا تاہم وہ نہ آسکے۔ نورجہاں گزشتہ ایک سال سے کینسر کے مرض میں مبتلا تھیں اور اس جان لیوا مرض کے باعث جانبر نہ ہوسکیں۔ انہیں پشاور میں ان کے آبائی قبرستان میں سپرد خاک کردیا گیا۔
