نامور اداکارہ ریشم نے عوام سے اپیل کی ہے کہ کورونا وائرس کو سنجیدگی سے لیا جائے، اس کے پھیلاؤ کو روکنے کا واحد حل حفاظتی تدابیر پر عمل پیرا ہونا ہے، ہم اس وقت حالت جنگ میں ہیں اور یہ ایسی جنگ ہے جس میں ہمیں بندوق اٹھا کر سرحدوں کی طرف جانے کی بجائے گھر میں بیٹھ کر مقابلہ کرنا ہے۔
ایک انٹر ویو میں ریشم نے کہا کہ اٹلی جیسے ملک میں اس وباء کے قابو سے باہر ہونے کی وجہ سے حفاظتی تدابیر پر بروقت عمل نہ کرنا تھا، ہمارے ملک کے پاس اتنے وسائل نہیں کہ اس وباء کے بے قابو ہونے کی صورت میں اتنی بڑی تعداد کو صحت کی سہولیات مہیا کی جا سکیں۔
انہوں نے کہا کہ خدارا عوام سے اپیل ہے کہ وہ اپنے گھروں میں رہ کر خود کو بھی اور دوسروں کو بھی محفوط کریں، یہ وقت سنجیدگی دکھانے کا ہے اور ہمیں اپنے ملک کو اس وائرس سے محفوظ رکھنے کے لئے اپنا کردار ادا کرنا ہے، میرا مطالبہ ہے کہ صاحب ثروت شخصیات مشکل حالات میں مستحق افراد کی مدد کریں۔
