خیبر پختونخوا اسمبلی میں اپوزیشن کے شور شرابے کے باوجود تمام قائمہ کمیٹیاں تحلیل کردی گئیں۔ خیبر پختونخوا اسمبلی پیر کو ایک بار پھر مچھلی بازار بنا رہا اور اپوزیشن ارکان نے سپیکر ڈائس کے سامنے کھڑے ہوکر احتجاج کیا۔
اپوزیشن کے ہنگامے کے باوجود بلوں کی منظوری کا سلسلہ بھی جاری رہا اور اس دوران کے پی کے اسمبلی کی تمام قائمہ کمیٹیاں تحلیل کردی گئیں۔ ضلع خیبر سے پاکستان تحریک انصاف(پی ٹی آئی) کے ممبر اسمبلی شفیق آفریدی نے قائمہ کمیٹیوں کو ختم کرنے کے لیے تحریک پیش کی جس کے بعد سپیکر مشتاق غنی نے 36 کمیٹیوں کو تحلیل کرنے کی باقاعدہ منظوری دے دی۔
شفیق آفریدی کا کہنا تھا کہ کمیٹیوں میں قبائلی اضلاع کے نمائندگی نہیں تھی۔ ہنگامہ آرائی کے دوران فنانس ترمیمی بل 2020 کی منظوری دی گئی جب کہ گلیات ڈویلپمنٹ اتھارٹی ترمیمی بل بھی منظور کرلیا گیا۔
اپوزیشن کے احتجاج کے باعث اجلاس صرف 40 منٹ چل سکا اور سپیکر نے اجلاس کل 2 بجے تک کے لیے ملتوی کردیا۔
