افغانستان سے کوئلہ اور سوفٹ اسٹون کی درآمد معطل، تاجران کو مشکلات کا سامنا
محراب شاہ آفریدی
افغانستان سے کوئلہ اور سوفٹ اسٹون کی درآمد پیر کے روز سے طورخم، غلام خان اور خرلاچی بارڈرز پر معطل کر دی گئی ہے، جس کی وجہ کسٹمز حکام کی جانب سے ’سرٹیفکیٹ آف کنٹری آف اوریجن‘ کی فراہمی سے مشروط کلیئرنس بتائی جا رہی ہے۔
کوئلہ درآمد کرنے والے تاجروں نے میڈیا کو بتایا کہ اتوار کے روز اچانک کلیئرنس کا عمل روک دیا گیا، تاہم پیر کی صبح انہیں آگاہ کیا گیا کہ کسٹمز کلیئرنس کے لیے ملک کا پیدائشی سرٹیفکیٹ ضروری ہوگا۔
درآمد کنندگان کے مطابق کلیئرنس کی اچانک معطلی سے سرحد کی افغان جانب سینکڑوں کوئلے اور سوفٹ اسٹون سے لدے ٹرک قطاروں میں کھڑے ہوگئے ہیں۔ اس اچانک شرط نے درآمد کنندگان اور ٹرانسپورٹرز میں عیدالاضحی سے قبل "چھوٹی سی افراتفری” کی کیفیت پیدا کر دی ہے، کیونکہ بیشتر تاجروں نے کلیئرنس مکمل کرکے جلد چھٹی پر جانے کی منصوبہ بندی کر رکھی تھی۔
طورخم کسٹمز کلیئرنگ ایجنٹس ایسوسی ایشن کے صدر مجیب اللہ شنواری نے بتایا کہ اسلام آباد میں اعلیٰ حکام سے پہلے سے موجود سامان کی ایک بار کلیئرنس کی اجازت کے لیے کوششیں جاری ہیں، تاکہ عید سے قبل درآمد کنندگان اور ٹرانسپورٹرز کو کچھ ریلیف مل سکے۔
انہوں نے کہا کہ کسٹمز حکام کو خدشہ ہے کہ افغان درآمد کے نام پر کسی اور ملک سے سامان درآمد کیا جا رہا ہو، جس کی وجہ سے وہ اس شرط پر زور دے رہے ہیں۔ شنواری کے مطابق افغان حکام سے درکار دستاویزات کے اجرا کے حوالے سے ماضی میں بات چیت ہوئی تھی، تاہم وزن، قیمت اور درآمد سے متعلق کچھ تکنیکی مسائل سامنے آئے تھے۔
انہوں نے مزید کہا کہ کوئلہ اور سوفٹ اسٹون کی درآمد میں کوئی بے ضابطگی نہیں، اور یہ معدنیات افغانستان کے مختلف علاقوں سے باقاعدہ لائی گئی ہیں، جس کے شواہد وقتاً فوقتاً کسٹمز حکام کو دیئے جا چکے ہیں۔
شنواری کے مطابق درآمد کی عارضی بحالی کے لیے پشاور، اسلام آباد اور کابل میں تمام متعلقہ حکام کو درخواست ارسال کر دی گئی ہے، اور انہیں اُمید ہے کہ عید سے پہلے اس حوالے سے اچھی خبر ملے گی۔
دوسری جانب کوئلہ درآمد کرنے والے تاجر جمشید خان نے میڈیا کو بتایا کہ پابندی سے قبل روزانہ تقریباً 300 سے 350 کوئلے سے بھرے اور 100 سے 150 سوفٹ اسٹون سے بھرے ٹرک طورخم، غلام خان اور خرلاچی کے راستے پاکستان آتے تھے۔
انہوں نے بتایا کہ درآمد کیا گیا کوئلہ پنجاب کے مختلف صنعتی شہروں کو بھیجا جاتا ہے جہاں یہ مختلف صنعتوں میں استعمال ہوتا ہے، جبکہ سوفٹ اسٹون کراچی لے جایا جاتا ہے جہاں سے اسے دیگر ممالک کو برآمد کیا جاتا ہے۔
