چیمپئنز ٹرافی: شان مسعود یا امام الحق؛ قومی سکواڈ میں صائم ایوب کی جگہ کون لے گا؟

جنوبی افریقہ کے خلاف ٹیسٹ سیریز کے دوران انجری کے شکار نوجوان اوپنر صائم ایوب کی آئی سی سی چیمپئنز ٹرافی میں شرکت ایک سوالیہ نشان بن گئی ہے جس کے بعد قومی سلیکٹرز ٹیسٹ کپتان شان مسعود کو آزمانے پر غور کر رہے ہیں۔ تاہم اس کا انحصار ویسٹ انڈیز کے خلاف آخری ٹیسٹ میں شان مسعود کی کارکردگی پر ہے۔ شان کے علاوہ امام الحق بھی ایک آپشن ہیں۔

ذرائع کے مطابق عبداللہ شفیق کی خراب کارکردگی کے بعد سلیکٹرز ون ڈے فارمیٹ میں صائم ایوب کی جگہ شان مسعود کو موقع دینے پر غور کر رہے ہیں کیوں کہ وہ 50 اوور کی کرکٹ میں لمبی اننگز کھیلنے کی صلاحیت رکھتے ہیں۔

شان نے آخری بار نیوزی لینڈ کے خلاف 2023 میں ون ڈے میچ کھیلا تھا۔ انہوں نے 9 ون ڈے انٹرنیشنل میچز میں ایک نصف سنچری کی مدد سے 163 رنز 18 کی اوسط سے بنائے ہیں۔

شان مسعود کے علاوہ فخر زمان کی ٹیم میں واپسی یقینی ہے جبکہ شاداب خان کی شمولیت کے امکانات نہ ہونے کے برابر ہیں۔

ایک ہفتے میں سلیکٹرز پاکستان میں ہونے والی تین قومی سیریز کیلئے ٹیم کا اعلان کریں گے، ممکنہ طور پر تین ملکی سیریز کھیلنے والی قومیی ٹیم ہی چیمپئنز ٹرافی میں حصہ لے گی۔

یہ بھی پڑھیں: ڈیرہ: وزیر اعلیٰ نے پولیس ٹریننگ سکول کا افتتاح کر لیا

صائم ایوب اس ماہ کے آخر تک انگلینڈ میں رہیں گے جہاں میڈیکل پینل کی ہدایت پر ان کا ری ہیب بھی جاری ہے، فروری کے اوائل میں وہ وطن واپس آ سکتے ہیں لیکن انہیں کرکٹ میں واپس لانے کیلئے جلد بازی سے گریز کیا جا رہا ہے۔

آئی سی سی چیمپئنز ٹرافی کے لیے سلیکٹرز کے درمیان ون ڈے اسکواڈ کو حتمی شکل دینے کے لیے مشاورت جاری ہے۔ چیمپئنز ٹرافی اسکواڈ سے آؤٹ آف فارم عبداللّٰہ شفیق اور عثمان خان کے ڈراپ ہونے کا امکان ہے۔

امام الحق اور حسیب اللہ کے ناموں پر بھی غور کیا جا رہا ہے۔ محمد رضوان، بابر اعظم، سلمان علی آغا، طیب طاہر اور عرفان خان کی اسکواڈ میں شمولیت کا امکان ہے۔ اس کے علاوہ محمد حسنین، نسیم شاہ، شاہین آفریدی، حارث رؤف، کامران غلام، ابرار احمد اور سفیان مقیم بھی اسکواڈ کا حصہ بن سکتے ہیں۔

پاکستان کے علاوہ چیمپئنز ٹرافی کی تمام ٹیموں نے اسکواڈز کا اعلان کر دیا ہے جب کہ پاکستان بھی آئی سی سی کو ابتدائی اسکواڈ کے نام بھجوا چکا ہے۔

واضح رہے کہ میگا ایونٹ کے لیے 11 فروری تک حتمی اسکواڈ کا لازمی اعلان کرنا ہے۔ پاکستان، جنوبی افریقہ اور نیوزی لینڈ کے درمیان سہ فریقی سیریز کا پہلا میچ 8 فروری کو ہو گا۔