ٹک ٹاکر ثنا یوسف کے قتل کے بعد ڈیجیٹل کریئیٹرز کے لیے سیکیورٹی الرٹ جاری
کم عمر ٹک ٹاکر ثنا یوسف کے قتل کے بعد پاکستان کی نیشنل سائبر ایمرجنسی رسپانس ٹیم (CERT) نے بلاگرز، وی لاگرز، انفلوئنسرز اور ڈیجیٹل کریئیٹرز کے لیے ایک اہم سیکیورٹی ایڈوائزری جاری کی ہے، جس میں انہیں آن لائن اور آف لائن دنیا میں ممکنہ خطرات سے بچنے کے لیے احتیاطی تدابیر اختیار کرنے کی ہدایت دی گئی ہے۔
ایڈوائزری میں خبردار کیا گیا ہے کہ سوشل میڈیا پر براہِ راست لوکیشن شیئر نہ کریں، نامعلوم افراد سے دوستی یا ملاقاتوں سے پرہیز کریں اور کسی مشتبہ تقریب یا نجی دعوت کو قبول نہ کریں۔
CERT کے مطابق، ڈیجیٹل کریئیٹرز کو اپنی سیکیورٹی کو اولین ترجیح دینی چاہیئے کیونکہ سوشل میڈیا پر بڑھتی ہوئی شہرت اکثر حقیقی زندگی میں سنگین خطرات کا باعث بن سکتی ہے، خاص طور پر ایسے ماحول میں جہاں ہراسانی اور جنون پر مبنی جرائم میں اضافہ ہو رہا ہے۔
اہم حفاظتی تجاویز میں شامل ہیں:
- لائیو سٹریمنگ یا ویڈیوز میں موجودہ وقت کی لوکیشن ظاہر نہ کریں۔
- تمام اکاؤنٹس پر مضبوط پاسورڈز اور ملٹی فیکٹر آتھنٹیکیشن استعمال کریں۔
- پرائیویسی سیٹنگز کو باقاعدگی سے چیک اور اپ ڈیٹ کریں۔
- مشتبہ لنکس یا ای میلز نہ کھولیں۔
- پیغامات اور کمنٹس پر نظر رکھیں، ہراسانی یا بدسلوکی کی صورت میں رپورٹ کریں یا بلاک کریں۔
- اگر جعلی مواد (جیسے ڈیپ فیک) آن لائن آ جائے تو فوری تردید جاری کریں اور رپورٹ کریں۔
ایڈوائزری میں مزید کہا گیا ہے کہ آن لائن رویے میں ذمہ داری برتنا بھی ضروری ہے کیونکہ معمولی سی لاپرواہی بھی خطرات کا سبب بن سکتی ہے۔
یہ ایڈوائزری 17 سالہ ٹک ٹاکر ثنا یوسف کے قتل کے بعد سامنے آئی ہے، جسے 2 جون کو اسلام آباد میں مبینہ طور پر ایک اور ٹک ٹاکر عمر حیات عرف "کاکا” نے گولی مار کر قتل کر دیا تھا۔ پولیس کے مطابق، 22 سالہ ملزم فیصل آباد سے تحائف لے کر ثنا کے گھر آیا تھا تاکہ اس کی سالگرہ کے موقع پر ملاقات کرے، لیکن انکار پر وہ بپھر گیا۔
پولیس کا کہنا ہے کہ ملزم کئی گھنٹے رابطہ کرنے کی کوشش کرتا رہا اور مبینہ طور پر گھر میں داخل ہو کر فائرنگ کر دی۔ ثنا نے آخری وقت میں اسے پرسکون کرنے کی کوشش کرتے ہوئے کہا: "میں پانی لے آتی ہوں، ریلیکس کریں”, لیکن اسی دوران اسے گولی مار دی گئی۔
