یوم پاکستان اور عیدالفطر کے موقع پر صدر مملکت کا قیدیوں کی سزاؤں میں کمی کا فیصلہ

صدر مملکت آصف علی زرداری نے آئین کے آرٹیکل 45 کے تحت سزا یافتہ قیدیوں کی سزاؤں میں 180 روز کی کمی کی منظوری دے دی ہے۔ یہ فیصلہ ایک تہائی قید مکمل کرنے والے مخصوص قیدیوں کے لیے کیا گیا ہے، جن میں 65 سال سے زائد عمر کے مرد اور 60 سال سے زائد عمر کی خواتین شامل ہیں۔

اس فیصلے کے تحت، بچوں کے ساتھ جیل میں موجود خواتین قیدیوں اور 18 سال سے کم عمر کے افراد پر بھی سزا میں کمی کا اطلاق ہوگا، بشرط یہ کہ انہوں نے ایک تہائی سزا کاٹ لی ہو۔ تاہم، اس کمی کا اطلاق سنگین جرائم میں ملوث افراد پر نہیں ہوگا۔

صدر کی جانب سے منظور کی گئی سزاؤں میں کمی کا اطلاق قتل، جاسوسی، ریاست مخالف سرگرمیوں، زنا، چوری، ڈکیتی، اغوا، دہشت گردی میں سزا یافتہ مجرمان، مالی جرائم، قومی خزانے کو نقصان پہنچانے والے، غیر ملکی افراد ایکٹ 1946 اور منشیات کنٹرول ایکٹ 2022 کے تحت سزا یافتہ افراد پر نہیں ہوگا۔