بجلی مہنگی 20 پیسے؛ صارفین پر بوجھ 1 ارب 18 کروڑ 70 لاکھ کا!

حکومت نے ملک بھر کے لیے بجلی کی قیمتوں میں فی یونٹ 20 پیسے کا اضافہ کر دیا۔

نیپرا نے بجلی کی قیمت میں اضافے کا نوٹیفکیشن جاری کر دیا گیا جس کے مطابق فی یونٹ 20 پیسے کا اضافہ رواں مالی سال کی پہلی سہ ماہی ایڈجسٹمنٹ کی مد میں کیا گیا ہے۔

نوٹیفکیشن میں کہا گیا ہے کہ اضافے کا اطلاق کراچی سمیت ملک بھر کے بجلی صارفین پر ہو گا اور اس سے بجلی صارفین پر 1 ارب 18 کروڑ 70 لاکھ روپے کا اضافی بوجھ پڑے گا۔

یہ بھی پڑھیں: شمالی وزیرستان: دو کارروائیوں کے دوران 7 عسکریت پسند مارے گئے

سہ ماہی ایڈجسٹمنٹ کا اطلاق دسمبر 2024 کے لیے ہو گا جبکہ اضافے کا اطلاق لائف لائن اور پری پیڈ بجلی صارفین پر نہیں ہو گا۔ اسی طرح ونٹر پیکیج کے تحت اضافی بجلی کے استعمال پر بھی سہ ماہی ایڈجسٹمنٹ کا اطلاق نہیں ہو گا۔

نیپرا کے مطابق گزشتہ مالی سال کی آخری سہ ماہی ایڈجسٹمنٹ کی وصولی نومبر میں ختم ہو گئی تھی جو 1 روپے 74 پیسے فی یونٹ تھی۔