کورونا وائرس کے پھیلاؤ کو روکنے کے اقدامات پر غور کے لیے قومی رابطہ کمیٹی (این سی سی) کا اجلاس طلب کر لیا گیا۔
وفاقی وزیر برائے منصوبہ بندی اسد عمر نے ایک ٹوئٹ میں بتایا کہ نیشنل کمانڈ اینڈ آپریشن سینٹر (این سی او سی) نے کورونا وائرس وبا کے پھیلاؤ میں دوبارہ سے آنے والی تیزی کی روک تھام کے لیے اقدامات پر غور کیا ہے، این سی او سی کی سفارشات قومی رابطہ کمیٹی کے (آج منگل کو) ہونے والے اجلاس میں پیش کی جائیں گی۔
NCOC discussed additional measures today to control the rising spread of Covid19. Recommendations will be tabled in the NCC being called for tomorrow. Need to take immediate measures which have the most impact on disease spread without curtailing economic activity
— Asad Umar (@Asad_Umar) November 2, 2020
ان کا کہنا تھا کہ بیماری کا پھیلاؤ روکنے کے لیے ایسے مؤثر اقدامات کرنا ضروری ہیں جن کے نتیجے میں معاشی سرگرمیاں متاثر نہ ہوں۔
واضح رہے کہ گذشتہ ہفتے سے ملک میں ایک بار پھر کورونا وائرس کی وبا کے پھیلاؤ میں تیزی آئی ہے اور روزانہ کے حساب سے دس یا اس سے زائد اموات جبکہ سینکڑوں کیسز رپورٹ ہو رہے ہیں۔
آج بھی کورونا وائرس کے سبب پاکستان میں مزید 12 افراد جان کی بازی ہار گئے ہیں اور مرنے والوں کی مجموعی تعداد 6 ہزار 835 ہو گئی ہے۔
اسی طرح یکم نومبر کو بھی ملک بھر میں 17 افراد کورونا کے باعث جان سے ہاتھ دھو بیٹھے تھے جبکہ فعال کیسز کی تعداد بڑھ کر 12 ہزار 592 ہو گئی تھی۔
نیشنل کمانڈ اینڈ آپریشن سینٹر (این سی او سی) کی جانب سے اس روز جاری کردہ اعداد و شمار کے مطابق گزشتہ 24 گھنٹوں میں کورونا کے977 نئے کیسز رپورٹ ہوئے جس کے بعد ملک بھر میں مجموعی کیسز کی تعداد 3 لاکھ 33 ہزار 970 ہو گئی۔
