ضلع کرم کے علاقے پاراچنار سبزی منڈی میں چیتے کے حملے سے دو افراد زخمی ہوگئے جنہیں علاج کے لیے قریبی اسپتال منتقل کردیا گیا۔
محکمہ وائلڈ لائف کے مطابق اتوار کی صبح ان اطلاع ملی کہ پاراچنار سبزی منڈی میں چیتے نے مقامی افراد پر حملہ کر دیا جس کے بعد ریسکیو 1122 اور وائلڈ لائف کے اہلکار موقع پر پہنچ گئے۔
انہوں نے بتایا چیتے کے حملے سے دو افراد زخمی ہوئے ہیں جبکہ موجود افراد نے مزید نقصان سے بچنے کے لیے چیتے کو ایک دکان میں بند کر رکھا ہے۔ ان کے مطابق واقعے کے بعد سبزی منڈی کو لوگوں سے خالی کردیا ہے جبکہ معلوم ہورہا ہے کہ چیتا قریبی جنگل سے آیا ہے۔
ڈی ایف او وائلڈ لائف منصف علی نے رابط کرنے پر بتایا کہ ضلع کرم میں چیتے کو ریسکیو کرنے کی سہولیات میسر نہیں اس لیے انہوں نے پشاور سے ٹیم بلائی ہے۔
ادھر چیتے کو ریسکیو کرنے کے لیے پشاور زو سے ٹیم پارا چنار روانہ ہوگئی ہے۔ ریسکیو ٹیم کو لیڈ کرنے والے ویٹرنری افیسر پشاور زو عبدالقادر خان کا کہنا ہے کہ ان کے ساتھ تمام سہولیات موجود ہے اور پہنچنے کے فوری طور پر چیتے کو ریسکیو کرکے پشاور زو منتقل کیا جائے گا۔
