محکمہ موسمیات نے خیبر پختونخوا کے بیشتر اضلاع میں آئندہ 24 گھنٹوں کے دوران موسم جزوی طور پر ابرآلود اور مرطوب رہنے کے ساتھ ساتھ بارش کی پیشگوئی کی ہے۔ بعض علاقوں میں تیز ہواؤں، آندھی اور گرج چمک کے ساتھ بارش کا بھی امکان ظاہر کیا گیا ہے، جس کے باعث ندی نالوں میں طغیانی اور پہاڑی علاقوں میں لینڈ سلائیڈنگ کا خدشہ پیدا ہو گیا ہے۔
محکمہ موسمیات کے مطابق پشاور، مردان، نوشہرہ، چارسدہ، صوابی، چترال، دیر، سوات اور بونیر میں بارش متوقع ہے۔ اسی طرح مالاکنڈ، باجوڑ، ایبٹ آباد، بٹگرام، شانگلہ، کوہستان، کولئی پالس اور تورغر میں بھی موسلادھار بارش ہو سکتی ہے۔
مزید اضلاع جن میں بارش کا امکان ہے ان میں مانسہرہ، کرم، خیبر، مہمند، اورکزئی، کوہاٹ، ہنگو اور کرک شامل ہیں، جبکہ لکی مروت، ڈی آئی خان، ٹانک، شمالی و جنوبی وزیرستان میں بھی گرج چمک کے ساتھ بارش کی پیشگوئی کی گئی ہے۔
محکمہ موسمیات نے خبردار کیا ہے کہ شدید بارشوں کے باعث چترال، سوات، بونیر، دیر، شانگلہ، کوہستان، بٹگرام، تورغر، مانسہرہ، ایبٹ آباد، مردان، صوابی، خیبر اور کرم کے ندی نالوں میں طغیانی آ سکتی ہے۔ تیز بارش کے نتیجے میں صوبے کے شہری علاقوں کے زیر آب آنے اور کمزور انفراسٹرکچر کو نقصان پہنچنے کا خدشہ بھی ظاہر کیا گیا ہے۔
بالائی علاقوں میں پہاڑوں پر لینڈ سلائیڈنگ کے امکانات بھی موجود ہیں، جس کے لیے متعلقہ اداروں کو الرٹ رہنے کی ہدایت کی گئی ہے۔
محکمہ موسمیات کے مطابق گزشتہ روز چترال، دیر، سوات، کوہستان، مانسہرہ، ایبٹ آباد اور نوشہرہ میں بارش ریکارڈ کی گئی۔ سب سے زیادہ بارش پٹن میں 41 ملی میٹر، کاکول میں 38 ملی میٹر، کالام میں 24 ملی میٹر اور بالاکوٹ میں 21 ملی میٹر ریکارڈ کی گئی۔
محکمہ موسمیات کے مطابق پشاور میں کم سے کم درجہ حرارت 24 جبکہ زیادہ سے زیادہ درجہ حرارت 33 ڈگری سینٹی گریڈ رہنے کا امکان ہے۔ سب سے کم درجہ حرارت مالم جبہ میں 12 اور کالام میں 15 ڈگری سینٹی گریڈ ریکارڈ کیا گیا ہے۔
