محکمہ موسمیات نے پیش گوئی کی ہے کہ خیبر پختونخوا میں آئندہ 24 گھنٹوں کے دوران موسم جزوی ابرآلود رہنے کے ساتھ بیشتر اضلاع میں بارش کا امکان ہے۔ پشاور، نوشہرہ، مردان، چارسدہ، صوابی، چترال، دیر، سوات اور بونیر سمیت متعدد علاقوں میں بارش کی پیشگوئی کی گئی ہے۔
محکمہ موسمیات کے مطابق، مالاکنڈ، باجوڑ، ایبٹ آباد، بٹگرام، شانگلہ، کوہستان، تورغر، مانسہرہ، کرم، خیبر، مہمند، اورکزئی، ہنگو، کرک، لکی مروت، بنوں، ٹانک، ڈی آئی خان اور شمالی و جنوبی وزیرستان میں بھی بارش متوقع ہے۔
چترال، سوات، بونیر، دیر، شانگلہ، کوہستان، بٹگرام اور تورغر میں ندی نالوں میں طغیانی اور لینڈ سلائیڈنگ کا خدشہ ظاہر کیا گیا ہے۔ مانسہرہ، ایبٹ آباد، مردان، صوابی، خیبر اور کرم میں بھی طغیانی کے خطرے کی وارننگ جاری کی گئی ہے۔
گزشتہ روز دیر، سوات، مانسہرہ، ایبٹ آباد، باجوڑ اور مہمند میں بارش ہوئی جبکہ بالاکوٹ میں 40، کاکول میں 31، اور مالم جبہ میں 28 ملی میٹر بارش ریکارڈ کی گئی۔
محکمہ موسمیات کے مطابق، پشاور کا کم سے کم درجہ حرارت 27 اور زیادہ سے زیادہ 35 ڈگری سینٹی گریڈ رہنے کا امکان ہے، جبکہ سب سے کم درجہ حرارت مالم جبہ میں 17 اور کالام میں 18 ڈگری سینٹی گریڈ ریکارڈ کیا گیا ہے۔
