خیبر پختونخوا کے مختلف اضلاع میں گرج چمک کے ساتھ بارش کا امکان

محکمہ موسمیات کے مطابق خیبر پختونخوا کے بیشتر اضلاع میں آئندہ چوبیس گھنٹوں کے دوران مطلع ابرآلود رہے گا اور گرج چمک کے ساتھ بارش کا امکان ہے، جبکہ بعض علاقوں میں ژالہ باری بھی ہو سکتی ہے۔

محکمہ موسمیات کا کہنا ہے کہ پشاور، نوشہرہ، مردان، چارسدہ، صوابی، چترال، سوات، شانگلہ، دیر، مالاکنڈ، بونیر، کوہستان، مانسہرہ، بٹگرام، تورغر، ایبٹ آباد، ہری پور، باجوڑ، مہمند، کوہاٹ، اورکزئی، خیبر، کرم، ڈی آئی خان، بنوں، لکی مروت، ٹانک، شمالی و جنوبی وزیرستان میں بارش کا امکان ہے۔

گزشتہ روز دیر، ایبٹ آباد، سوات، مانسہرہ، مردان اور پشاور میں بارش ریکارڈ کی گئی۔ محکمہ موسمیات کے مطابق پشاور میں 10 ملی میٹر، دیر میں 11 ملی میٹر، بالاکوٹ میں 9 ملی میٹر جبکہ کاکول اور تیمرگرہ میں 8 ملی میٹر بارش ہوئی۔

پشاور کا کم سے کم درجہ حرارت 24 ڈگری سینٹی گریڈ ریکارڈ کیا گیا جبکہ زیادہ سے زیادہ درجہ حرارت 38 ڈگری سینٹی گریڈ تک جانے کا امکان ہے۔ صوبے میں سب سے کم درجہ حرارت مالم جبہ میں 11 اور کالام میں 12 ڈگری سینٹی گریڈ ریکارڈ کیا گیا۔

محکمہ موسمیات نے شہریوں کو ہدایت کی ہے کہ وہ موسم کی صورت حال کے پیش نظر احتیاطی تدابیر اختیار کریں، خاص طور پر پہاڑی علاقوں میں سفر کرنے والے افراد بارش اور ممکنہ لینڈ سلائیڈنگ سے محتاط رہیں۔