خیبر پختونخوا میں آئندہ چوبیس گھنٹوں کے دوران بارش اور ژالہ باری کی پیشگوئی

محکمہ موسمیات کے مطابق خیبر پختونخوا میں آئندہ چوبیس گھنٹوں کے دوران مطلع جزوی ابر آلود رہنے کا امکان ہے۔ صوبے کے بیشتر اضلاع میں گرج چمک کے ساتھ موسلادھار بارش اور چند مقامات پر ژالہ باری بھی متوقع ہے۔

محکمہ موسمیات کے مطابق پشاور، مردان، چارسدہ، چترال، سوات، دیر، مالاکنڈ، بونیر، کوہستان، مانسہرہ، بٹگرام، تورغر، ایبٹ آباد، ہری پور، مہمند، باجوڑ، کوہاٹ، اورکزئی، خیبر، کرم، ڈی آئی خان، بنوں، لکی مروت، ٹانک اور شمالی و جنوبی وزیرستان میں بارش کی شدت میں اضافے کی توقع ہے۔

گذشتہ روز ایبٹ آباد، چترال، باجوڑ، سوات، دیر، کوہستان اور مانسہرہ میں بارش ہوئی۔ کاکول میں 21 ملی میٹر، باجوڑ میں 10 ملی میٹر اور میر کھنی میں 7 ملی میٹر بارش ریکارڈ کی گئی۔ پشاور کا کم سے کم درجہ حرارت 23 ڈگری سینٹی گریڈ ریکارڈ کیا گیا جبکہ زیادہ سے زیادہ درجہ حرارت 38 ڈگری سینٹی گریڈ تک جانے کا امکان ہے۔

سب سے کم درجہ حرارت کالام میں 11 ڈگری سینٹی گریڈ اور دیر میں 12 ڈگری سینٹی گریڈ ریکارڈ کیا گیا ہے۔