محکمہ موسمیات نے آئندہ 24 گھنٹوں کے دوران ملک کے بیشتر علاقوں میں موسم گرم اور خشک رہنے کی پیشگوئی کی ہے۔ تاہم خیبرپختونخوا، بالائی پنجاب، اسلام آباد، شمال مشرقی بلوچستان، کشمیر اور گلگت بلتستان میں مطلع جزوی طور پر ابرآلود رہنے کی توقع ہے۔
محکمہ موسمیات کے مطابق خیبرپختونخوا، بالائی پنجاب اور شمال مشرقی بلوچستان میں بارش کا امکان ہے، جبکہ اسلام آباد میں تیز ہواؤں کے ساتھ بارش کا امکان ہے۔ اس کے علاوہ خیبرپختونخوا اور خطہ پوٹھوہار میں چند مقامات پر ژالہ باری بھی متوقع ہے۔
خیبرپختونخوا کے بیشتر اضلاع میں موسم جزوی طور پر ابر آلود رہنے کا امکان ہے۔ صوبے کے جنوبی اضلاع میں دن کے اوقات میں موسم گرم رہنے کی پیشگوئی کی گئی ہے۔ چترال، دیر، سوات، شانگلہ، بونیر، مالاکنڈ، باجوڑ، ایبٹ آباد، مانسہرہ، ہری پور، بٹگرام، کوہستان، تورغر، کرم، خیبر، اورکزئی، مہمند، مردان اور صوابی میں گرج چمک اور تیز ہواؤں کے ساتھ بارش کا امکان ہے۔
جبکہ گلگت بلتستان اور آزاد کشمیر کے مختلف علاقوں میں تیز ہواؤں اور گرج چمک کے ساتھ بارش ہو سکتی ہے، جبکہ سندھ کے بیشتر اضلاع میں موسم شدید گرم اور خشک رہے گا۔
پشاور کا کم سے کم درجہ حرارت 19 ڈگری سینٹی گریڈ ریکارڈ کیا گیا، اور شہر کا زیادہ سے زیادہ درجہ حرارت 38 ڈگری سینٹی گریڈ تک جانے کا امکان ہے۔ سب سے کم درجہ حرارت کالام 7 اور چترال 10 ڈگری سینٹی گریڈ ریکارڈ کیا گیا۔
