لوئر دیر میں دو مختلف ٹریفک حادثات میں نوجوان سمیت 3 افراد جاں بحق ہو گئے۔
نمائندہ ٹی این این کے مطابق خال کے علاقہ گل ڈھیری میں ڈاٹسن گہرے کھائی میں جا گری جس کے نتیجے میں دو افراد جاں بحق جکہ چار شدید زخمی ہو گئے۔
خال پولیس کے مطابق گشتہ روز خال کے نواحی علاقہ گل ڈھیری میں ڈرا ئیور کشر خان سے ڈاٹسن بے قابو ہو کر گہرے کھائی میں جا گری جس سے ڈرائیور کشر خان اور نوجوان ابو ذر ولد جاوید سکنہ رباط ڈب جاں بحق ہوئے جبکہ جاوید نامی شخص کی اہلیہ اور ان کی دو سالہ بیٹی اور احتشام شدید زخمی ہو گئے۔
مقامی لوگوں نے زخمیوں کو خال ہسپتال منتقل کر دیا، پولیس نے بھی جائے وقو عہ پر پہنچ کر امدادی سرگرمیوں میں حصہ لیا اور رپورٹ درج کر کے تفتیش شروع کر دی۔
اسی طرح تیمرگرہ خزانہ میں تیز رفتاری کے باعث موٹر سائیکل الٹنے سے نوجوان جاں بحق جبکہ دو افراد شدید زخمی ہو گئے۔
نمائندہ ٹی این این کے مطابق بلامبٹ مانوگے کے رہائشی نوجوان ٹیلر ماسٹر شاہد جمیل اپنے دوستوں کے ہمراہ موٹر سائیکل پر جا رہے تھے کہ خزانہ کے مقام پر تیز رفتاری کے باعث سپیڈ بریکر کی وجہ سے ان کی موٹر سائیکل الٹ گئی جس سے نوجوان شاہد جمیل شدید زخمی ہوئے، بعد میں زخموں کی تاب نہ لا کر چل بسے جبکہ ان کے دو ساتھی شدید زخمی ہیں جنہیں ڈسٹرکٹ ہیڈ کوارٹر ہسپتال تیمرگرہ منتقل کر دیا گیا۔
بعد ازاں نوجوان شاہد جمیل کو نماز جنازہ کے بعد آبائی قبرستان مانوگے میں آہوں اور سسکیوں کے درمیان سپردخاک کر دیا گیا۔
