لوئر دیر کے علاقہ میدان حیا سیرئی میں پولیس گاڑی پر مبینہ طور پر ریموٹ کنٹرول دھماکہ 3 پولیس اہلکار زخمی ہو گئے جبکہ گاڑی کو شدید نقصان پہنچا۔
پولیس ذرائع کے مطابق میدان کے علاقہ حیا سیرئی بجلی گھر کے قریب اس وقت پولیس گاڑی کو ریموٹ بم سے نشانہ بنایا گیا جب پولیس معمول کے مطابق گشت پر تھی۔
دھماکہ سے گاڑی تباہ ہو گئی جبکہ گاڑی میں موجود ڈرائیور محمد نذیر، ہیڈ کانسٹیبل طارق منیر اور پولیس اہلکار جہان بادشاہ شدید زخمی ہوگئے۔
زخمیوں کو ڈسٹرکٹ ہیڈ کوارٹر ہسپتال تیمرگرہ منتقل کر دیا گیا جہاں ان کی حالت خطرے سے باہر بتائی جا رہی ہے۔
واضح رہے کہ آج ہی جنوبی وزیرستان میں سرچ آپریشن کے دوران دہشتگردوں کی فائرنگ سے تین سیکیورٹی اہلکار جاں بحق اور چار زخمی ہو گئے تھے۔
