خیبر پختونخوا پولیو ورکرز کے یومیہ معاوضہ اور الاونس کے ساتھ تمام اضلاع کو 71 کروڑ 60 لاکھ سے زائد رقم ریلیز کر دی گئی، محکمہ خزانہ نے تمام اضلاع کے ڈپٹی کمشنرز کو آگاہ کر دیا۔
اس حوالے سے ایمرجنسی آپریشن سنٹر (ای او سی) کے کوآرڈینیٹر عبدالباسط کا کہنا ہے کہ پولیو ورکرز کو اب 500 کی بجائے 1000 روپے یومیہ معاوضہ ملے گا، رواں سال پولیو ورکرز کے یومیہ معاوضہ میں سو فیصد اضافہ کر دیا گیا ہے، مہم کے دوران پولیو ورکرز کو ایک ہزار یومیہ خصوصی الاونس بھی دیا جائے گا۔
ان کا کہنا تھا کہ پولیو ورکرز کو پہلے فی مہم 2500 روپے الاؤنس ملتا تھا اب 5 سے 7 ہزار مہم الاونس ملے گا۔
ای او سی کوآرڈینیٹر کے مطابق سو فیصد اضافے سے پولیو ورکرز کا حوصلہ بڑھے گا۔ فرنٹ لائن ورکرز کی تنخواہوں اور مراعات میں اضافہ دیرینہ مسئلہ تھا جو حل کر لیا گیا۔
