چین سے پھیلنے والے مہلک کورونا وائرس سے ایران میں 8 افراد ہلاک ہوگئے جس کے نتیجے میں دنیا بھر میں ہلاکتوں کی تعداد 2600 ہوگئی ہے۔
دوسری جانب ایران کی نیم سرکاری نیوز ایجنسی النا نے رکن پارلیمنٹ کے حوالے سے بتایا ہے کہ ایران کے مذہبی طور پر مقدس شہر قم میں کورونا وائرس سے مرنے والوں کی تعداد 50 ہو گئی ہے۔
قم سے تعلق رکھنے والے ایرانی رکن پارلیمنٹ نے حکومت پر الزام لگایا کہ وہ ہلاکتوں کی اصل تعداد چھپا رہی ہے اور قم میں بڑی تعداد میں لوگ اس وائرس سے ہلاک ہوگئے ہیں۔
قم کے ایک مدرسے میں 250 افراد کو کورونا وائرس میں مبتلا ہونے کے خدشے کے باعث قرنطینہ میں رکھا گیا ہے، ملک بھر میں دو روز سے اسکول بند ہیں جبکہ وائرس پھیلنے کے خدشے کے باعث اس ہفتے ہونے والے عام انتخابات بھی ملتوی ہونے کا خطرہ پیدا ہوگیا ہے۔
یہ بھی پڑھیں:
پی آئی اے کی چین کیلئے پروایں ایک بار پھر معطل
کورونا وائرس، پاک ایران سرحد بند کرنے کا فیصلہ
کورونا وائرس، بلوچستان میں ایمرجنسی نافذ
عالمی ادارہ صحت نے ایران کی صورتحال پر شدید تشویش کا اظہار کیا ہے۔
دوسری طرف ایرانی وزارت صحت کا کہنا ہے کہ کورونا وائرس سے ہلاکتوں کی تعداد 12 ہے اور 61 افراد متاثر ہیں۔ ایران میں کورونا وائرس کی وجہ سے پاکستان کے ساتھ ساتھ ترکی اور آرمینیا نے بھی ایران کے ساتھ اپنی سرحد بند کردی ہے جو دوسرے روز بھی بند رہی۔
ادھر کویت، افغانستان اور بحرین میں بھی کورونا وائرس پہنچ گیا ہے اور ان ممالک نے اپنے ہاں کورونا وائرس کے کیسز کی تصدیق کردی ہے۔ کویت میں 3 جبکہ افغانستان اور بحرین میں ایک ایک مریض سامنے آیا ہے۔
دوسری جانب چین میں مزید 150 افراد کورونا سے ہلاک ہوگئے جس کے نتیجے میں ہلاکتوں کی تعداد 2592 جبکہ مریضوں کی تعداد 77150 ہوگئی۔ ادھر جنوبی کوریا میں 833 افراد اس وائرس سے متاثر ہو چکے ہیں جبکہ اب تک ایک مریض کی موت واقع ہوئی ہے۔
