پشاور کے نواحی علاقہ بڈھ بیر میں ملزمان کی گھر میں گھس کر فائرنگ کرنے سے بچوں اور خواتین سمیت ایک ہی خاندان کے آٹھ افراد جاں بحق جبکہ دو زخمی ہوگئے۔
ایس ایس پی آپریشنز کاشف ذولفقار نے تصدیق کرتے ہوئے بتایا کہ فائرنگ کا واقعہ جائیداد کے تنازعہ کے باعث پیش آیا جس میں مخالف فریق نے گھر میں گھس کر فائرنگ کر دی۔ پولیس کا کہنا ہے کہ فائرنگ سے گھر میں موجود چار خواتین اور چار بچے موقع پر جاں بحق ہوگئے جبکہ دو افراد زخمی ہوئے ہیں۔
واقعہ کے بعد پولیس نفری جائے وقوعہ پہنچ گئی ہے اور جاں بحق افراد کو پوسٹ مارٹم اور زخمیوں کو علاج کے لئے ہسپتال منتقل کردیا گیا ہے۔
دوسری جانب متاثرہ خاندان کے رشتہ دار صحافی خالد الرحمان نے واقعہ کی تصدیق کرتے ہوئے پولیس پر الزام لگایا ہے کہ یہ سانحہ پولیس کی غفلت کے باعث پیش آیا کیونکہ ان کے بقول وہ واقعہ کے دوران مسلسل ایک گھنٹہ پولیس کو کال کرتے رہے لیکن پولیس کی جانب سے کوئی جواب نہیں ملا جس کی وجہ سے قیمتی جانوں کا ضیاع ہوگیا۔
