ضلع خیبر میں نامعلوم افراد نے پولیو ٹیم پر حملہ کیا ہے جس کے نتیجے میں پولیو ورکر اور پولیس اہلکار زخمی ہوگئے۔ ابتدائی اطلاعات کے مطابق تھانہ باڑہ برقمبر خیل میں عربی مسجد کے قریب نامعلوم موٹر سائیکل سواروں نے ٹیم پر فائرنگ کی۔
فائرنگ سے پولیس اہلکار گل کریم اور پولیو ورکر عبداللہ زخمی ہوگئے جن کو حیات آباد میڈیکل کمپلیکس منتقل کردیا گیا ہے۔ پولیس کی بھاری نفری جائے وقوعہ پہنچ گئی اور علاقے کو گھیرے میں لے کر سرچ آپریشن شروع کردیا گیا ہے۔
یاد رہے کچھ روز قبل خیبر پختونخوا کے سب ڈویژن بیٹنی سابقہ ایف آر لکی میں بھی پولیو آبزرور کو ذبح کردیا گیا تھا۔ ایس ایچ او تھانہ آزاد خیل بیٹنی اسماعیل خان نے بتایا کہ غنی اللہ گھر سے نکل کر لاپتہ ہوگیا تھا۔ بعد ازاں اسکی ذبح شدہ لاش ملی۔
