بلوچستان کے علاقے ژوب میں سیکیورٹی فورسز نے کارروائی کرتے ہوئے 15 عسکریت پسندوں کو ہلاک کر دیا۔
پاک فوج کے شعبہ تعلقات عامہ (آئی ایس پی آر) کے مطابق 10 دسمبر 2024 کو، سیکورٹی فورسز نے ضلع ژوب کے علاقے سمبازہ میں انٹیلی جنس پر مبنی آپریشن کیا۔ اِس دوران عسکریت پسندوں کے مقام کو مؤثر طریقے سے نشانہ بنایا گیا، اور فائرنگ کے نتیجے میں 15 شدت پسند مارے گئے۔
آئی ایس پی آر کے مطابق ہلاک ہونے والے عسکریت پسندوں سے بھاری مقدار میں اسلحہ، گولہ بارود اور دھماکہ خیز مواد بھی برآمد ہوا ہے۔
یہ بھی پڑھیں: کرم: متاثرین کیلئے 17 کروڑ روپے اور امدادی سامان مہیا کر دیا۔ اسفندیار خٹک
ترجمان پاک فوج نے بتایا کہ شدید فائرنگ کے تبادلے کے دوران سپاہی عارف الرحمان (عمر 32 سال؛ ساکن ضلع مانسہرہ) نے بہادری سے لڑتے ہوئے جام شہادت نوش کیا۔
سیکیورٹی فورسز کی جانب سے علاقے میں موجود کسی اور عسکریت پسندوں کو بےاثر کرنے کے لیے سینیٹائزیشن آپریشن کیا جا رہا ہے۔
آئی ایس پی آر کا کہنا تھا کہ پاکستان کی سیکیورٹی فورسز قوم کے شانہ بشانہ ملک سے دہشت گردی کی لعنت کو ختم کرنے کے لیے پرعزم ہیں اور ہمارے بہادر جوانوں کی قربانیاں اس عزم کو مزید مضبوط کرتی ہیں۔
