طورخم بارڈر کے راستے افغان شہریوں کی وطن واپسی کا سلسلہ بدستور جاری ہے۔ محکمہ داخلہ خیبرپختونخوا کے مطابق گزشتہ روز 379 افغان سٹیزن کارڈ (ACC) ہولڈرز اور 864 غیر قانونی طور پر مقیم افغان باشندوں کو افغانستان واپس بھیجا گیا۔
سرکاری اعداد و شمار کے مطابق افغان باشندوں کی واپسی کے دوسرے مرحلے میں اب تک مجموعی طور پر 32 ہزار 101 اے سی سی کارڈ ہولڈرز اور 19 ہزار 182 غیر قانونی تارکین وطن کو افغانستان بھیجا جا چکا ہے، جس سے دوسرے مرحلے میں ڈیپورٹ ہونے والے افراد کی کل تعداد 51 ہزار 1 ہو گئی ہے۔
اسلام آباد سے 214 افغان سٹیزن کارڈ ہولڈرز اور 2 ہزار 20 غیر قانونی افغان باشندوں کو وطن واپس بھیجا گیا، جبکہ پنجاب سے 8 ہزار 167 اے سی سی کارڈ ہولڈرز اور 10 ہزار 408 غیر قانونی تارکین وطن کو ڈیپورٹ کیا گیا۔ گلگت بلتستان سے 2، آزاد کشمیر سے 1,165 اور سندھ سے 44 غیر قانونی طور پر مقیم افغان وطن واپس بھیجے گئے۔
محکمہ داخلہ کے مطابق رضاکارانہ طور پر 22 ہزار 924 اے سی سی ہولڈرز افغان مہاجرین نے طورخم کے راستے وطن واپسی اختیار کی۔ ستمبر 2023 سے اب تک خیبرپختونخوا کے مختلف سرحدی راستوں سے مجموعی طور پر 5 لاکھ 93 ہزار 352 افغان شہریوں کو وطن واپس بھیجا جا چکا ہے۔
