انڈس واٹر ٹریٹی کی معطلی اور سرحد کی بندش: بھارت کا پاکستان پر سفارتی وار
پہلگام واقعے کے بعد بھارت نے پاکستان کے ساتھ تاریخی انڈس واٹر ٹریٹی معطل کرتے ہوئے دوطرفہ تعلقات کو سنگین سطح پر ختم کرنے کا فیصلہ کیا ہے، جس پر خطے میں سفارتی بحران اور امن و استحکام کے امکانات کو شدید خطرہ لاحق ہو گیا ہے۔
بھارتی وزارت خارجہ نے پاکستان کے تمام ویزے منسوخ کرتے ہوئے پاکستانی شہریوں کو ملک چھوڑنے کے لیے 48 گھنٹے کی مہلت دی ہے، جبکہ واہگہ-اٹاری بارڈر کو بھی مکمل طور پر بند کر دیا گیا ہے۔ اس کے ساتھ ہی نئی دہلی میں پاکستانی ہائی کمیشن بند کرنے کا حکم جاری کر دیا گیا ہے اور تمام پاکستانی سفارتی عملے کو ایک ہفتے میں ملک چھوڑنے کی ہدایت دی گئی ہے۔
دوسری جانب بھارت نے اپنے دفاعی اہلکاروں کو اسلام آباد سے واپس بلا لیا ہے، جس سے دونوں ممالک کے درمیان فوجی رابطے بھی مکمل طور پر منقطع ہو گئے ہیں۔
ماہرین کا کہنا ہے کہ بھارت کی یہ کارروائیاں سفارتی عمل نہیں بلکہ سیاسی اسٹیج پرفارمنس کا حصہ معلوم ہوتی ہیں۔ جنوبی ایشیائی امور کے ایک ماہر نے تبصرہ کرتے ہوئے کہا: "یہ امن قائم رکھنے کا کوئی طریقہ نہیں، بلکہ ایک خطرناک سیاسی کھیل ہے جو ایک مشکوک واقعے کو بنیاد بنا کر تاریخی معاہدوں کو روند رہا ہے۔”
خیال رہے کہ 1960 میں عالمی بینک کی سرپرستی میں طے پانے والی انڈس واٹر ٹریٹی دونوں جوہری طاقتوں کے درمیان تنازعات کے باوجود قائم رہنے والا واحد معاہدہ رہا ہے۔ اس معاہدے کی معطلی نہ صرف آبی تنازعے کو جنم دے سکتی ہے بلکہ پورے خطے کے امن کے لیے سنگین خطرہ بن سکتی ہے۔
پاکستان میں تجزیہ کاروں نے بھارت کے حالیہ اقدامات کو ہائبرڈ وار فیئر کا تسلسل قرار دیا ہے، جس میں بھارت پروپیگنڈے، میڈیا مہمات، اور جارحانہ سفارت کاری کے ذریعے پاکستان کو عالمی سطح پر تنہا کرنے کی کوششیں کر رہا ہے۔
یاد رہے کہ دو روز قبل مقبوضہ کشمیر کے سیاحتی مقام پہلگام میں نامعلوم افراد کے حملے میں 26 غیر ملکی سیاح ہلاک ہوئے تھے، جن میں اطالوی اور اسرائیلی شہری بھی شامل تھے۔ بھارت نے تحقیقات کے بغیر اس حملے کا الزام براہ راست پاکستان پر عائد کرتے ہوئے کل انڈس واٹر ٹریٹی کی معطلی اور سفارتی تعلقات ختم کرنے کا اعلان کیا تھا۔
عالمی برادری سے مطالبہ کیا جا رہا ہے کہ وہ صورتحال کو قابو میں رکھنے کے لیے فوری مداخلت کرے تاکہ مزید بحران سے بچا جا سکے۔
